AQSh tsıfrlyq qyzmetter týraly zańǵa baılanysty EO saıasatkerlerine elge kirýge tyıym saldy
ASTANA. KAZINFORM - AQSh memlekettik departamenti Eýropa Odaǵynyń tsıfrlyq qyzmetter týraly dırektıvasyn daıyndaý isine qatysqan bes eýropalyqqa jáne EO-nyń ishki naryq máseleleri boıynsha burynǵy komıssary Terı Bretonnyń elge kirýine qajet vızany berýden bas tartty, dep habarlaıdy DW.
AQSh Memlekettik departamentiniń málimdemesinde bul adamdar óz laýazymyn amerıkalyq tulǵalar men kompanııalarǵa qarsy baǵyttalǵan qatań tsenzýralyq sharalardy ilgeriletý úshin paıdalanǵan radıkaldy belsendiler retinde kórsetilgen.
— AQSh prezıdenti Donald Tramp «Aldymen — Amerıka» qaǵıdatyna negizdelgen syrtqy saıasat eldiń egemendigine nuqsan keltirýge jol bermeıtinin ashyq kórsetti. Sheteldik tsenzorlardyń ókilettigin eksterrıtorııalyq túrde asyra paıdalanýyna da jol bermeımiz, — dep atap ótti AQSh memlekettik hatshysy Marko Rýbıo.
Memdepartamenttiń málimdemesinde Eýrokomıssııanyń burynǵy múshesi Terrı Breton sondaı-aq DSA zańynyń «arhıtektory» retinde sıpattalǵan. Bul zań EO aýmaǵynda jumys isteıtin barlyq ınternet-platformalar men áleýmettik jelilerdi paıdalanýshylardy zańsyz kontentten, taýarlar men qyzmetterden, sondaı-aq jalǵan aqparat pen óshpendilikten qorǵaýǵa mindetteıdi.
AQSh-taǵy respýblıkalyq partııa ókilderi DSA talaptary men áleýmettik jelilerdi moderatsııalaý erejelerin konservatorlarǵa qarsy baǵyttalǵan tsenzýralyq sharalar dep sanaıdy. Brıýssel bul aıyptaýlardy joqqa shyǵarady.
— Amerıkalyq dostarymyzǵa aıtarym, tsenzýra sizder oılaǵan jerde emes, — dep jazdy Breton AQSh-qa kirýge tyıym salynǵany týraly habardan keıin H áleýmettik jelisinde.
Terrı Breton 2024 jyldyń kúzinde Eýrokomıssııa tóraǵasy Ýrsýla fon der Lıaıenmen kelispeýshilikterge baılanysty ishki naryq jónindegi eýrokomıssar qyzmetinen ketken. Buǵan deıin ol H áleýmettik jelisiniń ıesi Ilon Maskpen de kelise almaı qalǵan. Bretonnyń oıynsha platforma Eýropa azamattarynyń quqyǵy men derbes derekterin qorǵaý zańdaryn saqtaýdan bas tartqan.
Buǵan deıin AQSh prezıdenti Donald Tramptyń ákimshiligi EO-nyń tsıfrlyq zańdaryn birneshe ret synǵa alǵan.
Aq úı basshysy amerıkalyq kompanııalarǵa zııan keltiretin elderge ımporttyq tarıfter engizemin dep qoqan-loqy jasaǵan. Soǵan qaramastan, Eýroodaq óz erejeleriniń oryndalýyn áli de talap ete beretinin málimdedi.
Osyǵan deıin EO amerıkalyq X platformasyna €120 mln aıyppul salǵany týraly jazdyq.