AQSh Transkaspıı bastamasy qoryna 201 mln dollar ınvestıtsııa salady
ASTANA. KAZINFORM – AQSh Memlekettik departamenti Ońtústik Kavkazda berik ári turaqty beıbitshilikti qamtamasyz etýge kúsh salyp jatqan Ázerbaıjan men Armenııany qoldaý aıasynda 201 mln dollar bólý týraly sheshim qabyldady, dep habarlaıdy Anadolý.
AQSh Memlekettik hatshysy Marko Rýbıo Orta dáliz dep te atalatyn Transkaspıı saýda baǵyty boıyndaǵy jeke sektor ınvestıtsııalaryna qoldaý kórsetetin Transkaspıı bastamasy qorynyń qurylǵanyn málimdedi.
Ázerbaıjan men Armenııa arasyndaǵy beıbit kelisimderdiń birinshi jyldyǵyna oraı málimdeme jasaǵan Rýbıo jańa dırektorlar keńesi qurylǵannan jáne AQSh úkimeti 201 mln dollar kóleminde qarjy bólgennen keıin bastamanyń «jumysyn bastaǵanyn» aıtty.
Rýbıo qordyń iske qosylýy Baký men Erevan arasyndaǵy uzaq jyldarǵa sozylǵan shıelenis báseńdegennen keıin ekonomıkalyq yntymaqtastyqtyń keńeıip kele jatqanyn kórsetetinin atap ótti.
– Beıbitshilik pen órkendeý bir-birin ózara kúsheıtedi, – dedi Marko Rýbıo.
Ol «Halyqaralyq beıbitshilik pen órkendeý jolyndaǵy Tramp baǵyty» (TRIPP) jobasy jaı ǵana ınfraqurylymdyq joba emes ekenin atap ótti.
AQSh Memlekettik hatshysy Vashıngton ákimshiligi Ońtústik Kavkazda berik ári turaqty beıbitshilikti qamtamasyz etýge qosqan úlesi úshin Armenııa men Ázerbaıjandy qoldaýdy jalǵastyratynyn málimdedi.
Transkaspıı bastamasy qory Ońtústik Kavkazdy Ortalyq Azııamen baılanystyratyn Orta dáliz boıyndaǵy jeke sektor ınvestıtsııalaryn yntalandyrýǵa baǵyttalǵan. Bul baǵyt Azııa men Eýropa arasyndaǵy balama saýda dálizi sanalady.
Eske sala ketsek, AQSh bıligi Kolýmbııaǵa esirtki kartelderimen kúres úshin 1 mlrd dollar bóletinin málimdedi.
