AQSh Tramptyń tapsyrmasynan keıin alǵash ret ballıstıkalyq zymyran synaǵyn ótkizedi

ASTANA. KAZINFORM — AQSh Tramptyń málimdemelerinen keıin kontınentaralyq ballıstıkalyq zymyrandy (MBR) alǵashqy ret synaqtan ótkizedi, dep habarlaıdy Newsweek.

AQSh turaqty ıadrolyq zarıady joq, biraq ıadrolyq zarıad tasýǵa qabiletti kontınentaralyq ballıstıkalyq zymyrannyń alǵashqy synaǵyn ótkizýge daıyndalyp jatyr.

Zymyran Kalıfornııadaǵy Vandenberg ǵarysh kúshteriniń bazasynan ushyrylyp, Marshall araldaryndaǵy Ronald Reıgan atyndaǵy zymyranǵa qarsy qorǵanys polıgonyna baǵyttalmaq. Aıtýynsha, synaq zymyrannyń múmkindikterin tekserýge arnalǵan, ıaǵnı ıadrolyq qarýdyń naqty detonatsııasy josparlanbaǵan.

Josparlanǵan ushyrylym sońǵy eki aıdaǵy ekinshi synaq bolady. Buǵan deıin osyndaı traektorııa boıynsha ushyrylym mamyr aıynda ótkizilgen. Qyrkúıekte AQSh-tyń sýasty kúshteri Atlantıka muhıtynda tórt oq-dárisiz zymyran ushyrǵan.

— Navıgatsııalyq eskertýler kórsetkendeı, AQSh ıadrolyq zarıad tasýǵa qabiletti, biraq zarıady ornatylmaǵan kontınentaralyq ballıstıkalyq zymyrannyń alǵashqy synaǵyn josparlaǵan, — dep derekkóz habarlady.

Buǵan deıin 30 qazanda Donald Tramp Pentagonǵa ıadrolyq qarýdyń synaqtaryn dereý bastaý jóninde tapsyrma bergen.

Artynsha Tramp AQSh-tyń ıadrolyq synaq júrgizetinin rastady.

Al AQSh Energetıka mınıstri Krıs Raıt Tramptyń tapsyrmasynda  komponentterdi, ıaǵnı atomdyq jarylysty iske qosýǵa qajetti bólshekterdi tekserý týraly aıtylǵanyn jáne naqty detonatsııalar týraly emes ekenin naqtylady.