AQSh-tyń joǵary laýazymdy tulǵalary qaýipsizdik úshin áskerı bazalarǵa kóship jatyr

ASTANA. KAZINFORM — AQSh prezıdenti ákimshiliginiń joǵary laýazymdy ókilderi konservatıvti saıası belsendi Charlı Kırk qaza tapqannan keıin qaýipsizdik maqsatynda áskerı bazalarǵa kóshirile bastady, dep habarlaıdy The Atlantic basylymy.

Basylymnyń málimetinshe, Donald Tramp ákimshiliginiń birqatar joǵary shendi ókilderi Kırktiń óliminen keıin jáne elde Tramp saıasatyna qarsy órshigen narazylyqtardan soń qaýipsizdik sharalaryn kúsheıtý maqsatynda áskerı bazalarǵa ornalasýda.

Sonymen qatar sheneýnikter men olardyń otbasylaryna baǵyttalǵan qaýip-qaterlerdiń kóbeıgeni de kóshýge sebep bolǵan. Áskerı bazalarda olar Qorǵanys mınıstrligi tarapynan qorǵalýǵa múmkindik alady.

The Atlantic dereginshe, qazirgi ýaqytta áskerı nysandarda memlekettik hatshy Marko Rýbıo, Pentagon basshysy Pıt Hegset, ishki qaýipsizdik mınıstri Krıstı Noem, federaldyq úkimet jumysynyń tıimdiligin arttyrý jónindegi vedomstvonyń (DOGE) baspasóz hatshysy Ketı Mıller jubaıy, ári prezıdent Tramptyń ishki saıasat jónindegi bas keńesshisi Stıven Mıllermen birge, sondaı-aq qurlyq áskerleri mınıstri Denıel Drıskoll turyp jatyr.

Eske sala ketsek, qyrkúıek aıynyń basynda Tramptyń jaqtasy ári saıası belsendi Charlı Kırkke ıÝta shtatynyń Utah Valley ýnıversıteti kampýsynda sóılep turǵan sátinde oq atylǵan.

Saıasatker moınynan jaralanyp, aýyr halde aýrýhanaǵa jetkizilgen edi. Keıin Donald Tramp onyń qaıtys bolǵanyn habarlady.