AQSh-tyń jeti shtaty laınerdegi hantavırýs juqtyrǵan jolaýshylardy baqylaýǵa aldy

Aqparatqa sáıkes, krýızdik laınerdegi 150 jolaýshynyń arasyndaǵy 17 amerıkalyq Ispanııanyń Tenerıfe aralyna evakýatsııalanady.

AQSh-tyń Aýrýlardy baqylaý jáne aldyn alý ortalyqtary Kanar araldaryna epıdemıologtar men medıtsına qyzmetkerlerinen quralǵan top jiberetinin málimdedi.

Olar amerıkalyqtardy qarsy alyp, keıin Nebraska shtatyndaǵy Omaha qalasynda ornalasqan Nebraska medıtsınalyq ortalyǵynyń Ulttyq karantın bólimine ornalastyrady.

Karantın bóliminde 20 bos oryn bar. Ár adamǵa jeke bólme men tamaq qarastyrylǵan. Jolaýshylardyń densaýlyǵyn ınfektsııalyq aýrýlar mamandaryn qosa alǵanda, medıtsına qyzmetkerleri kún saıyn baqylap otyrady.

Eger jolaýshylardan aýrý belgileri anyqtalsa, olar bıologııalyq qaýip tóndiretin naýqastarǵa arnalǵan arnaıy oqshaýlaý bólimine aýystyrylady. Bul bólimde 2020 jyly COVID-19 indetiniń alǵashqy naýqastary, al 2014 jyly Ebola bezgegimen aýyrǵandar emdelgen.

Mamandar hantavırýs ınkýbatsııalyq kezeńi alty aptaǵa deıin sozylýy múmkin ekenin aıtady. Osyǵan baılanysty AQSh-tyń federaldyq jáne jergilikti densaýlyq saqtaý organdary amerıkalyq jolaýshylardyń jaǵdaıyn baqylaýdy kúsheıtken.

Djordjııa, Tehas, Arızona, Vırdjınııa, Kalıfornııa jáne Nıý-Djersı shtattarynyń densaýlyq saqtaý departamentteri laınerde bolǵan amerıkalyqtardy jáne olarmen baılanysta bolýy múmkin azamattardy baqylaýǵa alǵanyn habarlady.

Laınerdegi indetke sebep bolǵan and shtamyndaǵy hantavırýs adamnan adamǵa juǵýy múmkin. Alǵashqy juqtyrý kózi Ońtústik Amerıkada kezdesetin kúrish egeýquıryqtary men olardyń zári, silekeıi nemese nájisi bolǵan.

Sarapshylardyń bir bóligi AQSh-tyń qańtar aıynda Dúnıejúzilik densaýlyq saqtaý uıymynan shyǵýy eldiń hantavırýs týraly aqparatty alǵashqylardyń biri bolyp alý múmkindigin tómendetýi múmkin dep alańdaýshylyq bildirip otyr.

Aıta keteıik, buǵan deıin DDU MV Hondius laınerinen evakýatsııalanǵan jolaýshylarǵa 42 kúndik karantındi usynǵan bolatyn.