AQSh-tyń jańa soqqylarynan keıin Ormýz buǵazyndaǵy kemelerge shabýyl jasaldy – Iran
ASTANA. KAZINFORM – AQSh áskeri Iranǵa qarsy jańa soqqylar jasaı bastady. Buǵan deıin AQSh prezıdenti Donald Tramp Tegeran soǵysty toqtatý jónindegi kelisimdi tym uzaqqa sozyp jatqandyqtan, amerıkalyq kúshter elge «qatań soqqy beredi» dep málimdegen edi. Bul týraly VVS jazdy.
AQSh Ortalyq qolbasshylyǵy (Centcom) sársenbi kúni «ózin-ózi qorǵaý maqsatynda» kóptegen nysanalarǵa soqqy bere bastaǵanyn habarlady. Málimdemede bul shabýyldardyń «Irannyń negizsiz ári jalǵasyp jatqan agressııasyna jaýap» ekeni aıtylǵan.
Memlekettik BAQ habarlaǵandaı, Iran áskeri Ormýz buǵazyndaǵy kemelerge soqqy beretinin málimdegennen keıin kóp uzamaı Islam revolıýtsııasy saqshylary korpýsynyń (IRGC) áskerı-teńiz kúshteri eki kemege shabýyl jasaǵan.
Sońǵy ýaqytta taraptar áskerı jáne barlaý nysandaryna soqqy jasap keledi. Bul ózara áýe shabýyldarynyń aıtarlyqtaı kúsheıgenin kórsetedi. Jarylystar Parsy shyǵanaǵyndaǵy Keshm aralynda, sondaı-aq Bender-Abbas pen Sırıkti qosa alǵanda birqatar qalada estilgen.
AQSh soqqylaryna jaýap retinde Irannyń joǵary áskerı qolbasshylyǵy Ormýz buǵazy arqyly ótetin barlyq kemelerge, sonyń ishinde munaı tankerleri men saýda kemelerine shabýyl jasalatynyn eskertti.
Strategııalyq mańyzy zor buǵazda patrýl júrgizip júrgen Islam revolıýtsııasy saqshylary korpýsynyń áskerı-teńiz kúshteri kóp uzamaı «zańsyz ótpek bolǵan» eki munaı tankerine soqqy bergenin málimdedi.
AQSh-tyń sońǵy shabýyly bastalardan birneshe saǵat buryn Tramp:
– Keshe biz olarǵa kúshti soqqy berdik, búgin de taǵy kúshti soqqy beremiz, – dep eskertken.
Tramp Truth Social áleýmettik jelisinde Iran basshylyǵynyń «kelisim jasaýdy tym uzaqqa sozyp jatqanyn» jazdy. Al Iran Syrtqy ister mınıstrligi AQSh-ty «qarama-qaıshy málimdemeler jasaý arqyly dıplomatııalyq protseske zııan keltirip otyr» dep aıyptady.
Tramptyń sózderine jaýap retinde Iran prezıdenti Masýd Pezeshkıan Irannyń «kez kelgen qysym men qaýip-qaterge tabandy túrde qarsy turatynyn» málimdedi.
Keıinirek AQSh qorǵanys mınıstri Pıt Hegset bombalar «Irandaǵy mańyzdy nysandarǵa tastalatynyn» aıtty.
Aıta keteıik, buǵan deıin Ońtústik Koreıa paıdalanatyn taǵy bir keme Ormýz buǵazy arqyly ótkenin jazdyq.
