AQSh-tyń Iemenge soqqysynan 68 adam qaza tapty
ASTANA. KAZINFORM – AQSh qarýly kúshteriniń Iemenniń soltústik-batysyndaǵy Saada qalasyndaǵy mıgranttar ortalyǵyna jasaǵan soqqysynan qaza tapqandar sany 68 adamǵa jetti, 47 adam jaraqat aldy. Bul týraly Iemendegi «Ansar Allah» qozǵalysynyń Al Masirah telearnasy habarlady, dep jazady TASS.
Buǵan deıin 35 adamnyń qaza taýyp, 50 adamnyń jaralanǵany týraly habarlanǵan bolatyn. Telearnanyń málimetinshe, jaralanǵandardyń kóbi aýyr halde.
Oqıǵa kezinde ortalyqta 115 mıgrant bolǵan. Olar negizinen Afrıka elderinen kelgen azamattar.
Eske sala keteıik, 2023 jyly Gaza sektoryndaǵy jaǵdaı shıeleniskennen keıin, hýsıtter Izraıl aýmaǵyna shabýyl jasaıtynyn jáne Izraılmen baılanysy bar kemelerdiń Qyzyl teńiz ben Bab-el-Mandeb buǵazynan ótýine jol bermeıtinin málimdegen edi.
Birshama ýaqyttan keıin, ıaǵnı qańtarda Gaza sektorynda bitim ornap, shabýyldar toqtaǵan bolatyn. Alaıda naýryzdyń basynda bitim buzylyp, hýsıtter Izraıl kemelerine qaıta shabýyldaı bastady.
15 naýryzda AQSh prezıdenti Donald Tramptyń buıryǵymen AQSh qarýly kúshteri Iemendegi hýsıtterdiń baqylaýyndaǵy nysandarǵa jappaı áýe soqqylaryn bastady. AQSh Ortalyq qolbasshylyǵy bul operatsııanyń maqsaty — amerıkalyq múddelerdi qorǵaý jáne Qyzyl teńizdegi kemelerdiń qaýipsiz ótýin qamtamasyz etý ekenin túsindirdi.
Oǵan jaýap retinde «Ansar Allah» qozǵalysy Qyzyl teńizdiń soltústiginde ornalasqan Harry Truman áýe tasymaldaýshy kemesine birneshe ret shabýyl jasaýǵa tyrysqan.
Aıta keteıik, buǵan deıin AQSh áskerı kúshteri sońǵy bir apta ishinde Iemen aýmaǵyna kem degende 260 áýe soqqysyn jasaǵanyn jazdyq.