AQSh-tyń Vırdjınııa shtatynda 2027 jyldan bastap marıhýana erkin satylady
ASTANA. KAZINFORM – Vırdjınııa shtaty marıhýanany jeke maqsatta saqtaýdy zańdastyrǵan AQSh-tyń ońtústigindegi alǵashqy shtat atanǵannan keıin bes jyl ótken soń, ony rekreatsııalyq maqsatta zańdy túrde satýǵa múmkindik beretin tártipti bekitti, dep habarlaıdy Associated Press.
Dúısenbi kúni qabyldanǵan shtattyń bıýdjettik zańy 2027 jylǵy 1 shildeden bastap Vırdjınııa aýmaǵynda kannabıs satatyn 350-ge deıin dúken ashýǵa ruqsat beredi. Bul sheshim federaldyq deńgeıde marıhýana áli de zańsyz bolyp sanalsa da, shtattardyń zańnamalyq bastamalary arqyly oǵan qoljetimdilikti keńeıtý baǵytyndaǵy kezekti qadam boldy.
– Vırdjınııa birneshe jyl buryn eresekterdiń marıhýana saqtaýyn zańdastyrdy. Alaıda retteletin bólshek saýda naryǵy bolmaǵandyqtan, zańsyz naryqtyń saqtalýyna jol berdik, – dedi shtat senatory, zań jobasynyń negizgi avtorlarynyń biri Lashrıs Eırd.
Onyń aıtýynsha, qabyldanǵan ymyraly sheshim qaýipsiz ári tıimdi júıe qalyptastyrady. Ol tutynýshylardy qorǵaıdy, ónimniń zerthanalyq tekserilýi men tańbalanýyn qamtamasyz etedi jáne baǵasy zańsyz naryqpen básekelese alatyn zańdy naryq qurady.
Buǵan deıin Vırdjınııada medıtsınalyq marıhýana baǵdarlamasy jumys istep kelgen. Ol patsıentterge arnaıy dárihanalar arqyly preparat satyp alýǵa múmkindik bergen. Endi shtattyń retteýshi organdary bólshek saýda lıtsenzııalaryn alýǵa ótinimderdi 2027 jylǵy 1 aqpannan bastap qabyldaıdy. Al 21 jastan asqan azamattarǵa marıhýanany zańdy túrde satý sol jyldyń 1 shildesinde bastalady.
Jańa zań boıynsha marıhýanany saqtaýǵa ruqsat etilgen mólsher 28 gramnan 56 gramǵa deıin ulǵaıtyldy. Sondaı-aq azamattardyń úı jaǵdaıynda az mólsherde qarasora ósirý quqyǵy saqtalady.
Shtat satýdan alynatyn salyqqa qosymsha aktsız engizedi. Zań shyǵarýshy organnyń bıýdjettik qujattaryna sáıkes, bul salyqtar baǵdarlamanyń alǵashqy jylynda shtat qazynasyna shamamen 51 mıllıon AQSh dollary kóleminde kiris ákeledi.
Aıta keteıik, buǵan deıin AQSh esirtki kontrabandasymen aıyptalǵan kemege shabýyl jasady.
