AQSh-tyń Venesýeladaǵy áreketi men Grenlandııaǵa qatysty jospary nesimen uqsas

ASTANA. KAZINFORM — Sarapshylar AQSh-tyń Venesýelaǵa jasaǵan áskerı operatsııasynan keıin Grenlandııaǵa qatysty qaýipterge salǵyrt qaramaýǵa shaqyrdy. Olardyń pikirinshe, AQSh prezıdenti Donald Tramptyń Grenlandııany AQSh qorǵanysy úshin strategııalyq mańyzy bar aýmaq retinde kórsetýi Venesýelaǵa qatysty qatań saıasatpen uqsas sıpatqa ıe.

Bul týraly «Anadolý» agenttigine Kıoto ýnıversıtetiniń dotsenti Paskal Lottaz, jazýshy Devıd Kronın jáne Rasmussen Global kompanııasynyń aǵa keńesshisi Nıko Lange málimdedi.

Paskal Lottaz AQSh-tyń Venesýelaǵa basyp kirýin Ekinshi dúnıejúzilik soǵystan bergi halyqaralyq quqyqty eń óreskel buzýshylyqtardyń biri dep atap, Eýropanyń kóp bóliginiń bul áreketke únsiz qalǵanyn synǵa aldy. Onyń aıtýynsha, mundaı tózimdilik Grenlandııaǵa qatysty qaýipterdi de shynaıy dep qabyldaýdy talap etedi.

Devıd Kronın Tramptyń Venesýela men Grenlandııaǵa qatysty qatań rıtorıkasynyń túpki maqsaty strategııalyq mańyzy bar resýrstardy baqylaý ekenin aıtty. Ol Eýroodaqtyń Madýro úkimetin zańsyz dep tanýy AQSh-tyń Venesýeladaǵy áreketterin janama túrde qoldaǵanymen teń ekenin de atap ótti.

Nıko Langeniń pikirinshe, Eýropa Grenlandııaǵa qarsy kez kelgen agressııanyń naqty saldary bolatynyn ashyq kórsetýi tıis. Ol Tramptyń áreketterin quqyqtyq logıkamen túsindirýge tyrysý qate ekenin aıtyp, AQSh prezıdentiniń jedel ári pragmatıkalyq tásilmen áreket etetinin atap ótti.

Sarapshylardyń aıtýynsha, qalyptasqan jaǵdaı Eýropany óziniń saıası, ekonomıkalyq jáne áskerı áleýetin kúsheıtýge májbúrleıdi.

Eske sala ketsek, byltyr jeltoqsanda Tramptyń arnaıy ókili Grenlandııaǵa qatysty josparyn aıtqan edi. Naqty aıtsaq, AQSh prezıdenti Donald Tramp Grenlandııa boıynsha arnaıy ókili etip taǵaıyndaǵan Lýızıana gýbernatory Djeff Lendrı Aq úıdiń araldy jaýlap alý jospary joq ekenin anyq bildirdi.