AQSh-tyń Táýelsizdik kúni jeti adamnyń qazasymen aıaqtaldy
ASTANA. KAZINFORM — AQSh-taǵy Táýelsizdik kúnin toılaý kezinde zorlyq-zombylyq saldarynan kem degende jeti adam qaza taýyp, ártúrli qalalarda on shaqty adam jaraqat aldy, dep habarlaıdy Kazinform agenttiginiń Vashıngtondaǵy tilshisi NBC News-ke silteme jasap.
Nıý-Iorktiń Konı-Aılend aýdanyndaǵy Brýklınde qara maska kıgen er adam senbi kúni keshke mereke kúnin atap ótip jatqan otbasyǵa oq jaýdyryp, kem degende segiz adamdy, onyń ishinde tórt balany jaralady. Keýdesine oq tıgen 21 jastaǵy áıeldiń jaǵdaıy áli aýyr. Qarýly adam qashyp ketti, izdeý jumystary jalǵasyp jatyr.
Florıdada jeksenbi kúni túnde Pensakola qalasynyń ortalyǵynda bolǵan atysta 19 jastaǵy er adam qaza taýyp, taǵy alty adam jaraqat aldy. Qarýly adam áli tabylǵan joq.
Jeksenbi kúni túngi saǵat 3-ten keıin Indıana shtatynyń Fort-Ýeın qalasynda da atys boldy. Bir áıel qaza tapty, segiz eresek adam oq jaraqatymen aýrýhanaǵa jatqyzyldy.
Indıana shtatynyń Gerı qalasynda jeksenbi kúni tańerteń eki atys bolyp, 10 jasar bala qaza tapty. 50 jastaǵy er adamnyń jaǵdaıy áli aýyr.
Kalıfornııa shtatynyń Kompton qalasynda senbi kúni saǵat 23:30 shamasynda kópqabatty úı kesheninde ótken Táýelsizdik kúnine arnalǵan úlken keshte bir áıel men bir er adam qaza tapty. Taǵy úsheýi — er adam, áıel jáne qyz — aýyr jaraqatpen aýrýhanalarǵa jetkizildi. Er adamnyń jaǵdaıy aýyr.
Ogaıo shtatynyń Deıton qalasynda 3 shilde keshke Oregon okrýginde bolǵan atysta tórt adam jaraqat aldy.
Ogaıo shtatynyń Kanton qalasynda 46 jastaǵy áıel jatyn bólmesinde jatyp, arqasyna otshashý tıip, aýyr jaraqat aldy.
Mıssýrı shtatynyń Sent-Lýıs qalasynda senbi kúni tún ortasynda bolǵan atysta 17 jastaǵy jasóspirim qaza tapty. Taǵy eki 16 jastaǵy jasóspirim oq jaraqatymen aýrýhanaǵa jetkizildi.
Kalıfornııa shtatynyń Chıno qalasynda úlken otshashý jarylysynan bir adam qaza taýyp, eki adam aýyr jaraqat aldy.
Buǵan deıin AQSh-ta Táýelsizdik kúnin merekeleý kezinde 400-den astam adam ustalǵan bolatyn.
