AQSh-tyń tanymal ýnıversıtetteri «Bolashaq» tiziminen nelikten alyndy
ASTANA. KAZINFORM – Ǵylym jáne joǵary bilim mınıstri Saıasat Nurbek AQSh-tyń tanymal ýnıversıtetteriniń «Bolashaq» tiziminen nelikten alynǵanyn aıtty.
- Ókinishke qaraı, sońǵy birneshe jylda Boston, Deıvıstegi Kalıfornııa, Ońtústik Kalıfornııa syndy birqatar ýnıversıtetke azamattarymyz kóptep oqýǵa túse bastady. Munyń ústine olar óte myqty, reıtıngteri asa joǵary ýnıversıtetter. Sondyqtan atalǵan ýnıversıtetterge tıisti súranys jiberdik. Jyl saıyn ondaǵan, al Boston ýnıversıteti júzdegen shaqyrtý hatyn jiberý syryn suradyq. Óıtkeni olarǵa túsý óte kúrdeli. Biraq, kóp adam oqýǵa túsedi, - dedi mınıstr Úkimet otyrysynan keıingi brıfıngte agenttik tilshisiniń saýalyna oraı.
Onyń aıtýynsha, atalǵan joǵary oqý oryndaryna túsýge kepildikti qamtamasyz etetin kompanııalar bolǵan.
- Biz atalǵan ýnıversıtettermen kelissóz júrgizip, mundaı kompanııalardy alyp tastaýdy ótindik. Olaı bolmaǵan jaǵdaıda tiziminen shyǵaratynymyzdy eskerttik. Óıtkeni, bizge sapa qajet. Alaıda atalǵan joǵary oqý oryndary ymyraǵa kelmegendikten osyndaı sheshim qabyldaýymyzǵa týra keldi, - dedi Saıasat Nurbek.
Buǵan deıin Májilis depýtaty Magerram Magerramov «Bolashaq» baǵdarlamasy boıynsha granttan aıyrylǵan stıpendıattardyń qarajatty qaıtarýyn ındeksteýdi usynǵan edi.
