AQSh-tyń taǵy bir shtatyn sý basty: adamdar iz-tússiz joǵalyp, úıler aǵyp ketti

ASTANA. KAZINFORM – AQSh-ta taǵy bir shtatta sý tasqyny bolyp, birneshe adam qaza tapty. Ulttyq meteorologııalyq qyzmeti Nıý-Meksıko shtatynda kenetten bolǵan sý tasqynyna baılanysty tótenshe jaǵdaı jarııalady, dep jazdy Oxu.az.

Oxu.Az saıty bul týraly CBS News málimdegenin habarlady.

Qyzmettiń derekterine sáıkes, qysqa ýaqyt ishinde shtatta 4–6 santımetr mólsherinde jaýyn-shashyn túsken. Qaıǵyly jaǵdaılar da tirkeldi: Lınkoln qalasynda áke men onyń eki balasyn sý aǵyny alyp ketken, sonyń saldarynan olar aýyr jaraqat alyp, qaza tapqany aıtyldy.

Birneshe adam iz-tússiz joǵalyp ketken dep habarlanady, biraq olardyń naqty sany ázirge belgisiz. Kóptegen turǵyndar aýyr jaraqat alǵan.

Sondaı-aq, Albýkerke qalasyndaǵy ózen arnasynan asyp, qalada sý tasqynyna sebep boldy.

Meteorologııalyq qyzmet: «Ózenge jaqyndamańyzdar! Bıik jerlerge shyǵyńyzdar!» — dep eskertti.

Rýıdoso qalasynda qatty aǵyn ǵımarattardy jyljyta bastaǵan. Áleýmettik jelilerde ózenmen aǵyp bara jatqan úılerdiń vıdeolary tarady.

Budan bólek, osy aptada Tehastyń ortalyq bóliginde de iri sý tasqyny boldy. Gvadelýpa ózeni kúrt kóterilip, tarıhtaǵy ekinshi eń joǵary deńgeıge jetken.

Eske sala keteıik, Tehastaǵy sý tasqynynan qaza tapqandar sany 100-den asqanyn jazǵan edik. Arasynda 28 bala bar.