AQSh-tyń Slovenııadaǵy elshisi laýazymyna alǵash ret qazaq qyzy taǵaıyndaldy
ASTANA. KAZINFORM — AQSh Senaty dúısenbi kúni ótken daýys berýde Slovenııadaǵy elshi laýazymyna Ásel Robertstiń kandıdatýrasyn maquldady. Ol 49 úmitkerden turatyn ortaq paket aıasynda bekitildi. Daýys berý qorytyndysy boıynsha 46 senator qoldap, 43-i qarsy shyqty, dep habarlaıdy Mladina.
Ásel Robertstiń kandıdatýrasyn osy jyldyń aqpan aıynda Prezıdent Donald Tramp usynǵan bolatyn, al naýryzda ol Senat komıtetindegi tyńdaýdan sátti ótti.
Naýryz aıynda ótken Senat komıtetiniń tyńdaýynda Ásel Roberts eki el arasyndaǵy ekonomıkalyq baılanystardy jandandyrýǵa barynsha kúsh salatynyn aıtqan edi. Ol Slovenııany AQSh-tyń NATO-daǵy mańyzdy odaqtasy, senimdi dosy ári seriktesi retinde sıpattady. Sondaı-aq eki memlekettiń ortaq múddeleri, demokratııalyq qundylyqtary men qorǵanys salasyndaǵy berik seriktestigi bar ekenin atap ótti.
— Men Slovenııanyń eýroatlantıkalyq aımaqty qorǵaý jáne kez kelgen qaýip-qaterdiń aldyn alý isinde mańyzdy býyn bolyp qala berýine yqpal etemin. Bul eldiń Ortalyq Eýropa men Batys Balqan toǵysynda ornalasqan strategııalyq pozıtsııasy transatlantıkalyq saýdany tereńdetýge úlken múmkindik beredi. Al bul saýda — álemdik ekonomıkanyń basty tiregi ári Amerıkanyń ósip-órkendeýiniń kepili, — dedi Roberts.
Sondaı-aq jańa elshi Slovenııanyń qorǵanys salasyna bólgen shyǵyndaryn JІÓ-niń 2 paıyzǵa deıin ulǵaıtqanyn jáne bul kórsetkishti 2030 jylǵa qaraı 3 paıyzǵa jetkizýdi josparlap otyrǵanyn málimdedi.
Búginde Slovenııa Kosovodaǵy NATO mıssııasyna jáne Bosnııa men Gertsegovınadaǵy Eýropa Odaǵynyń operatsııalaryna belsendi qatysyp keledi. Roberts bul eldiń ekonomıkalyq áleýeti men bilikti mamandaryn joǵary baǵalap, Slovenııany ozyq óndiris salalary shoǵyrlanǵan ortalyq dep atady.
Aıta keteıik, buǵan deıin 2021-2024 jyldar aralyǵynda AQSh-tyń Slovenııadaǵy elshisi qyzmetin Djeımı Harpýtlıan atqarǵan bolatyn.
Qazaqstannyń AQSh-taǵy elshiligi Ásel Robertsti jańa laýazymymen quttyqtady. Dıplomatııalyq ókildik óz quttyqtaýynda onyń Amerıka tarıhynda elshi laýazymyna taǵaıyndalǵan alǵashqy etnıkalyq qazaq ekenin erekshe atap ótken.
Ásel Roberts osy ýaqytqa deıin AQSh Memlekettik departamentiniń Bas protokol qyzmetinde aǵa keńesshi bolyp jumys istep keldi. Ol bul vedomstvoda jıyrma jylǵa jýyq eńbek etip, Amerıkanyń birneshe kontınenttegi mıssııalarynyń jumysyn úılestirýde jáne sheteldik úkimet ókilderimen kelissózder júrgizýde úlken tájirıbe jınaqtaǵan.
Ár jyldary Roberts Bas protokol keńesshisiniń mindetin atqarýshy, resmı saparlar bólimi basshysynyń orynbasary jáne hattama jónindegi dıplomatııalyq ofıtser qyzmetterin atqardy. Sonymen qatar Aq úıge ýaqytsha issaparmen jiberilip, Vıtse-prezıdent apparatynda Batys qanattaǵy operatsııalar dırektsııasyn basqardy.
2020–2021 jyldardaǵy bılik tranzıti kezeńinde Roberts AQSh-tyń Bas hattama keńesshisiniń mindetin atqardy. Jalpy alǵanda, ol AQSh-tyń bes prezıdenttik ákimshiligi tusynda joǵary deńgeıdegi kelissózderdi uıymdastyrýǵa qatysqan. Sheteldik kóshbasshylardyń AQSh Prezıdentimen, Vıtse-prezıdentimen jáne Memlekettik hatshysymen ótken kóptegen kezdesýleri men resmı qabyldaýlaryn tikeleı basqardy.
Ásel Roberts 1976 jyly Qazaqstanda dúnıege kelgen, Keńes Odaǵy ydyraǵannan keıin AQSh-qa qonys aýdarǵan. Ol Djordjtaýn ýnıversıtetiniń Edmýnd Ýolsh atyndaǵy Dıplomatııalyq qyzmet mektebin halyqaralyq quqyq jáne uıymdar mamandyǵy boıynsha bakalavr dárejesimen támamdady. Jańa elshi qazaq, orys jáne japon tilderin jetik meńgergen.
Aıta keteıik, buǵan deıin, AQSh Senaty FQJ basshysy laýazymyna Tramp usynǵan Kevın Ýorshty bekitken edi.
