AQSh-tyń shyǵys jaǵalaýyna daýyl, nóser jańbyr jáne sý tasqyny qaýpi tóndi
ASTANA. KAZINFORM – Osy aptanyń sońynda AQSh-tyń shyǵys jaǵalaýynda soltústik-shyǵys daýyly qalyptasyp, joıqyn jel, nóser jańbyr men sý tasqynyna ákelýi múmkin, dep habarlaıdy AQSh Ulttyq meteorologııalyq qyzmeti.
Soltústik-shyǵys daýyly – Soltústik Amerıkanyń shyǵys jaǵalaýynda qalyptasatyn, jeli ádette soltústik-shyǵystan soǵatyn daýyl túri. Mundaı daýyldar jyldyń kez kelgen ýaqytynda bolýy múmkin, alaıda qyrkúıek pen sáýir aralyǵynda jıi ári kúshtirek baıqalady. Olar nóser jańbyr nemese qar jaýyp, ekpindi jel soǵýyna, teńizde tolqyndardyń kóterilýine jáne jaǵalaýdy sý basýyna ákelýi múmkin.
AQSh Ulttyq meteorologııalyq qyzmetiniń málimetinshe, dúısenbi kúni aýa raıy júıesi Atlant muhıtynyń orta bóligindegi jáne soltústik-shyǵys shtattarǵa qaraı jyljýyna baılanysty eldiń ortalyq jáne shyǵys bólikterinde jańbyr jaýyp, naızaǵaı oınaıdy.
Appalach taýlary men Atlant muhıtynyń orta bóligindegi aýdandarda dúısenbi jáne seısenbi kúnderi birneshe márte ortasha jáne keı jerlerde qatty jańbyr jaýady dep boljanyp otyr. Bul jaýyn-shashyn mólsheriniń shamadan tys kóbeıýi men sý tasqyny qaýpin arttyrady. Sondaı-aq AQSh-tyń ońtústik-shyǵysy men Appalach óńiriniń keı jerlerinde qatty naızaǵaı bolýy múmkin.
Aýa raıynyń qalyptasqan jaǵdaıy AQSh-tyń shyǵys jaǵalaýynda birneshe kún boıy qurlyqqa qaraı soǵatyn qatty jeldiń turýyna ákelýi yqtımal. Bul jaǵalaýdy sý basyp, jaǵajaılardyń shaıylý qaýpin arttyrady. Sonymen qatar tolyq Aıdyń shyǵýy teńizdegi sý deńgeıin kóterip, jaǵalaýdaǵy sý tasqyny qaýpin kúsheıtýi múmkin.
Florıda shtatynyń ońtústiginde de sý tasqyny bolýy yqtımal. Munda ylǵaldy tropıkalyq aýa massasy seısenbige deıin kún saıyn jańbyr jaýyp, naızaǵaı oınaýyna jaǵdaı jasaıdy. Al Nıý-Meksıko men Tehas shtatynyń batys bólikterinde ylǵaldyń artýy men atmosferanyń turaqsyzdyǵy keı jerlerde qatty jańbyr jaýyp, sý tasqynyna ákelýi múmkin.
Aldaǵy front ótkennen keıin AQSh-tyń soltústik-ortalyq jáne shyǵys bólikterinde aýa temperatýrasy tómendeıdi. Bul óńirlerde kúndizgi temperatýra 60 gradýs Farengeıt shamasynda bolady. Al eldiń ońtústik-shyǵysy men ońtústik jazyqtarynda aýa raıy jyly ári ylǵaldy bolyp, temperatýra 80–90 gradýs Farengeıtke deıin kóteriledi.
Eske sala ketsek, buǵan deıin Japonııaǵa taǵy da taıfýn jaqyndap kele jatqanyn jazdyq.
Osy «Dýtszıýan» taıfýny nóser jańbyr men laı kóshkinin týyndatyp, adam shyǵyny bolǵany habarlandy.
