AQSh-tyń Sharlott qalasynda zańsyz mıgranttarǵa qarsy reıd bastaldy

ASTANA. KAZINFORM — AQSh-ta federaldyq bılik Soltústik Karolına shtatynyń eń iri qalasy Sharlottta zańsyz mıgranttarǵa qarsy aýqymdy reıdterdi qolǵa aldy, dep habarlaıdy TASS.

Buqaralyq aqparat quraldarynyń málimetinshe, qalaǵa AQSh Pogranıchnyı patrýliniń qyzmetkerleri keldi. Operatsııany Gregorı Bovıno basqaryp otyr. Ol buǵan deıin Chıkago (Illınoıs shtaty) men Los-Andjeleste (Kalıfornııa shtaty) zańsyz mıgratsııamen kúres operatsııalary úshin jaýapty bolǵan.

Eldiń ishki qaýipsizdik mınıstrliginiń ókili Trısha Maklaflın The New York Times gazetine vedomstvo Sharlottqa qosymsha kúsh jibergenin rastady. Onyń aıtýynsha, mundaı sharalar «amerıkalyqtardyń qaýipsizdigin qamtamasyz etý» jáne olardyń «qylmysker-zańsyz mıgranttar otbasylaryna nemese kórshilerine zııan tıgizedi dep qoryqpaı ómir súrýine múmkindik berý» úshin jasalyp otyr.

NBC News telearnasynyń habarlaýynsha, Pogranıchnyı patrýl qazirdiń ózinde tutqyndaý júrgizgen. Al jergilikti bılik mundaı sharalar «qoǵamda qajetsiz úreı men belgisizdik sezimin týdyrady» dep málimdep, qala turǵyndaryn sabyr saqtaýǵa jáne quqyq qorǵaý organdaryna qatysty zorlyq-zombylyq jasamaýǵa shaqyrdy.

Sharlott tamyz aıynda federaldyq bıliktiń nazaryn aýdartqan edi. Sebebi ýkraınalyq bosqyn Irına Zarýtskaıanyń qastandyqpen óltirilýinen keıin qalada jaǵdaı shıelenisken. Amerıkalyq Dekarlos Braýn poıyzda 23 jastaǵy qyzǵa pyshaqpen shabýyl jasaǵan. Qylmysker ustalyp, oǵan kisi óltirý baby boıynsha aıyp taǵyldy. Donald Tramptyń aıtýynsha, Braýn buryn da qylmystyq jaýapkershilikke tartylǵan, polıtsııa ony keminde 14 ret ustaǵan, biraq ol árdaıym eshqandaı kepildik tólemeı-aq bosatylǵan.

Buǵan deıin AQSh prezıdenti Donald Tramp baǵanyń ósýine qatysty alańdaýshylyqqa baılanysty kofe, sıyr eti, banan, apelsın shyryny sekildi 200-den astam ónimge salynǵan ımporttyq tarıfterdi alyp tastaý týraly sheshim qabyldaǵany habarlanǵan.