AQSh-tyń Ras Isa portyna jasaǵan áýe shabýylynan 13 adam qaza tapty

ASTANA. KAZINFORM – Iemendik hýsıt kóterilisshileriniń málimdeýinshe, AQSh-tyń Qyzyl teńizdegi «Ras Isa» portyna jasaǵan áýe soqqylary saldarynan keminde 13 adam qaza tapty, dep habarlaıdy VVS. 

- Amerıka agressııasy saldarynan porttaǵy 13 jumysshy qaza taýyp, taǵy 30-y jaraqat aldy, - dep keltirdi AFP hýsıtterdiń baspasóz hatshysy Anıs Alasbahıdiń áleýmettik jelide jarııalaǵan habarlamasyn.

Osyǵan deıin AQSh áskeri hýsıtterge janarmaı jetkizýdi toqtatý úshin soqqy bergenin jazǵan bolatyn.

- Amerıka kúshteri mundaı áreketterge Iran qoldaıtyn terrorıst-hýsıtterge janarmaı jetkizýdi toqtatý jáne olardyń zańsyz kiristerin joıý úshin barǵan. Óıtkeni bul kiris kózi keıingi 10 jyldaǵy hýsıtterdiń búkil álem boıynsha terrorıstik áreketterin qarjylandyryp keldi, - delingen AQSh Ortalyq qolbasshylyǵynyń (CENTCOM) málimdemesinde.

AQSh áskerıleriniń málimetinshe, Vashıngton osy jyldyń basynda kóterilisshilerdi sheteldik lańkestik uıym dep jarııalaǵanyna qaramastan, kemeler port arqyly otyn jetkizýdi jalǵastyrdy.

Buǵan deıin AQSh Iemenge 12-den astam áýe soqqysyn jasaǵanyn habarlaǵan bolatynbyz.