AQSh-tyń iri bankterinde jappaı tehnıkalyq aqaý boldy
ASTANA. KAZINFORM — AQSh-taǵy birneshe iri banktiń klıentteri onlaın qyzmetterdi paıdalanýda qıyndyqqa tap boldy. Sonyń saldarynan shottaryna kirip, qarjylyq operatsııalar júrgize almaǵandar bar. Bul týraly DW habarlaıdy.
Downdetector derekterine sáıkes, paıdalanýshylar Bank of America, Chase, J.P. Morgan, U.S. Bank, Wells Fargo bankteri men Zelle tólem servısiniń jumysynda aqaý bolǵanyn habarlaǵan.
Chase bankiniń ókilderi bul jaǵdaı kıbershabýylǵa baılanysty emes, tehnıkalyq aqaýdan týyndaǵanyn málimdedi.
— Tehnıkalyq aqaýǵa baılanysty keıbir tranzaktsııalardy óńdeý ádettegiden uzaqqa sozylyp jatyr. Degenmen klıentter óz shottary men qarajatyna qol jetkize alady. Biz máseleni múmkindiginshe tezirek sheshý úshin jumys istep jatyrmyz, — delingen bank málimdemesinde.
Bul habarlamalar Microsoft kompanııasynyń 13 qarashada bolǵan aýqymdy tehnıkalyq aqaýynan birneshe kún ótken soń jarııalandy. Ol kezde kompanııanyń Outlook, Teams jáne Copilot sııaqty birqatar servısi birneshe saǵat boıy istemeı qalǵan edi. Eki oqıǵanyń ózara baılanysy bar-joǵy ázirge belgisiz.
Buǵan deıin AQSh-ta avıadıspetcherlerdiń baılanys júıesindegi aýqymdy úzilis saldarynan ushaqtar tórt saǵat boıy áýege kóterile almaı turǵany habarlandy. Aqaý el boıynsha áýejaılarǵa áser etip, ushý kestesine aıtarlyqtaı kedergi keltirdi.