AQSh-tyń ortalyq aımaqtarynda 50 mln adamǵa tornado qaýpi tónip tur
ASTANA.KAZINFORM - AQSh-tyń ortalyq bóliginde joıqyn daýyldar kúsheıip, mıllıondaǵan adam qaýipti aımaqta qaldy.
Bul týraly agenttiktiń Vashıngtondaǵy menshikti tilshisi habarlady.
Uly jazyqtar aýmaǵynda bolǵan kúshti daýyldar tornado, iri burshaq, ekpindi jel jáne sý tasqyny qatar órship otyr.
Kún raıyn boljaý ortalyǵy Kanzastyń ortalyq bóliginen Mıssýrıdiń soltústik-batysyna jáne Nebraskanyń ońtústik-batysyna deıingi aýmaqta qaýip deńgeıin 5 baldyń 4-ine deıin kóterdi.
Mamandardyń málimetinshe, mundaı joǵary deńgeıdegi eskertý jylyna shamamen 14 kún ǵana jarııalanady.
Oklahomadan Aıovaǵa deıingi turǵyndarǵa tornado qaýpi jóninde eskertý jasaldy. Qaýipti aımaqqa Kanzas-Sıtı, Omaha, Lınkoln jáne De-Moın qalalary da kirip otyr.
ABC News deregine sáıkes, AQSh-tyń ortalyq bóliginde shamamen 50 mln adam joıqyn daýyl qaýpi bar aımaqta turady. Ázirge zardap shekkender týraly aqparat túsken joq.
WSVN telearnasynyń habarlaýynsha, jeksenbi kúngi daýyldardan keıin aımaqta shamamen 20 tornado tirkelgen.
Nebraska, Kanzas, Ońtústik Dakota jáne Aıovanyń soltústik-batysynda dıametri iri burshaq jaýyp, jel jyldamdyǵy saǵatyna 112 shaqyrymnan asqan.
Nóser jaýyn saldarynan sý tasqyny qaýpi de kúsheıdi.
Eskertý Nebraskanyń ońtústik-shyǵysynan Kanzastyń shyǵysyna deıingi aýmaqta, sondaı-aq Mıssýrıdiń batysy men ortalyq bóliginde jarııalandy. Bul óńirlerde sý basý qaýpi 4 baldyń 3-ine baǵalanyp otyr.
Sınoptıkterdiń boljamynsha, seısenbi kúni Tehastan Vermontqa deıingi aýmaqta da kúshti daýyl qaýpi saqtalady.
Osyǵan deıin Ortalyq Azııanyń klımattyq ózgeristerdiń dál ortasynda turǵany týraly jazdyq.
