AQSh-tyń Nıý-Djersı shtatynda 6600 sheteldik saılaýshylar tizimine qatelikpen engizilgen
ASTANA. KAZINFORM — AQSh-tyń Nıý-Djersı shtatynda 2023–2024 jyldary shamamen 6600 AQSh azamaty emes adam baǵdarlamalyq qamtamasyz etýdegi qatelik saldarynan saılaýshylar tizimine qate tirkelgen, dep habarlaıdy Kazinform agenttiginiń Vashıngtondaǵy menshikti tilshisi NBC News-ke silteme jasap.
Nıý-Djersı shtatynyń demokrat gýbernatory Maıkı Sherrıll olardyń esimderi saılaýshylar tiziminen shyǵarylatynyn málimdedi. Onyń aıtýynsha, bul adamdar óz kinásinen emes, 2023 jylǵy maýsym men 2024 jylǵy maýsym aralyǵynda shtattyń kólik quraldaryn tirkeý júıesindegi eleýli baǵdarlamalyq qate saldarynan tirkelgen.
Sherrılldiń aıtýynsha, atalǵan azamattar júrgizýshi kýáligi men jeke kýálikke ótinish bergen kezde AQSh azamaty ekendigi týraly suraqqa «joq» dep jaýap bergen. Soǵan qaramastan, júıe olardy avtomatty túrde saılaýshylar tizimine engizgen.
Nıý-Djersıde daýys bergen AQSh azamattyǵy joq adamdardyń sany shtattaǵy saılaýshylardyń jalpy sanymen salystyrǵanda óte az bolǵanymen, bul jaǵdaı prezıdent Donald Tramptyń AQSh-taǵy saılaýlarǵa kóptegen shetel azamattary qatysady degen málimdemelerin kúsheıtýi múmkin.
AQSh prezıdenti Kongresti SAVE America Act zańyn qabyldaýǵa shaqyryp otyr. Bul zań saılaýǵa qatysý úshin jeke basyn kýálandyratyn qujattar men AQSh azamattyǵyn rastaýǵa qatysty jańa talaptardy engizýdi kózdeıdi.
Seısenbi kúni AQSh Ádilet mınıstriniń kómekshisi Harmıt Dıllon vedomstvo bul oqıǵaǵa qatysty tergeý júrgizip jatqanyn málimdedi. Mınıstrlik 6600 shetel azamatynyń tolyq aty-jóni, týǵan kúni, azamattyǵy, mekenjaıy jáne tirkelgen kúni týraly málimetterdi, sondaı-aq ótken saılaýda daýys bergen 400 adamnyń daýys berý ýaqyty men orny týraly aqparatty suratqan.
Aıta keteıik, 2024 jyly Oregon shtatynyń bıligi ákimshilik qatelik saldarynan 1200-den astam shetel azamatynyń saılaýshylar tizimine engizilgenin habarlaǵan. Al 2018 jyly Kalıfornııa bıligi shamamen 1500 shetel azamatynyń qatelikpen tirkelýi múmkin ekenin málimdegen.
Osydan buryn Donald Tramp AQSh saılaýynyń olqylyǵy týraly qupııa málimetterdi jarııalady.
