AQSh-tyń memlekettik qaryzy tarıhta alǵash ret 40 trln dollardan asty
ASTANA. KAZINFORM — AQSh-tyń memlekettik qaryzy 2017 jyldan beri eki ese ósip, tarıhta alǵash ret 40 trln dollardan asty. Bul federaldy bıýdjet tapshylyǵynyń turaqtylyǵy aıasynda jańa rekordtyq deńgeı, dep habarlaıdy FOX Business.
Sarapshylardyń málimetinshe, bul soma shamamen Qytaı, Germanııa, Japonııa, Ulybrıtanııa jáne Úndistan ekonomıkalarynyń jalpy qunymen shamalas.
AQSh-tyń ulttyq qaryzy júktemeniń artýy men paıyzdyq mólsherlemelerdiń ósýine, sondaı-aq el halqynyń qartaıýyna baılanysty áleýmettik qamsyzdandyrý men medıtsınalyq kómekke federaldyq shyǵyndardyń artýyna baılanysty tez ósip keledi.
— Amerıkanyń JІÓ-ge qatysty memlekettik qaryzynyń araqatynasyn qalpyna keltirý úshin ekonomıkalyq ósimdi jedeldete otyryp federaldyq shyǵyndardaǵy ysyrapshyldyq, alaıaqtyq jáne teris paıdalanýdy azaıtýǵa basa nazar aýdaryldy, — dep atap ótti Tramp ákimshiligi.
Alaıda sarapshylar memlekettik qaryzdyń qarqyndy ósýi qarapaıym amerıkalyqtarǵa da áser etip otyrǵanyn aıtady. Qaryzdyń rekordtyq deńgeıge jetýi ıpoteka men avtonesıe sııaqty qaryzdardyń qymbattaýyna ákelýi múmkin. Sonymen qatar ınvestıtsııaǵa qarajaty azaıǵan kásiporyndar jalaqyny tómendetip, taýarlar men qyzmetterdiń baǵasyn kóterýge májbúr bolady.
— Eger qazirgi jáne bolashaq urpaqtyń ómir súrý deńgeıin jaqsartqymyz kelse, zań shyǵarýshylar AQSh-ty qarjylyq turǵydan qoljetimdi ári turaqty jolǵa túsirý úshin qazirden bastap áreket etýi kerek, — dedi AQSh-tyń bıýdjettik saıasatyn zertteıtin Pıter G. Peters qorynyń bas dırektory Maıkl A. Peterson.
Memlekettik qaryzdyń shamamen úshten bir bóligi COVID-19 indeti bastalǵannan keıingi eki jylda ósti. Donald Tramp pen Djo Baıdenniń tusynda úkimet pandemııamen kúresý úshin kóp mólsherde qaryz aldy.
Tramp 2025 jyldyń qańtarynda ekinshi ret qyzmetke kiriskennen beri AQSh-tyń memlekettik qaryzy 3,8 trln dollarǵa ósti. Bul prezıdenttiginiń eki merziminde jalpy qaryzdyń 11,6 trln dollarǵa ósýine yqpal etti.
Osyǵan deıin Donald Tramp AQSh-ta benzın qymbattaǵany úshin keshirim suraýdan bas tartty.
