AQSh-tyń memlekettik qaryzy 37 trln dollardan asty

ASTANA. KAZINFORM – AQSh-tyń memlekettik qaryzy 37 trln dollardan asty, bul Amerıkaǵa «is júzinde» bankrottyq qaýpin tóndirip otyr, dep habarlaıdy Yahoo Finance. 

Mıllıarder kásipker Ilon Mask AQSh-tyń qarjylyq bolashaǵyna qatysty taǵy alańdaýshylyq bildirip, federaldyq qaryz boıynsha paıyzdyq mólsherlemelerdiń turaqsyz deńgeıge kóterilýiniń aýyr saldary týraly eskertti.

Mask H-tegi jazbasynda Qurama Shtattardyń federaldyq qaryzy 37 trln dollardan asýy sebebimen «is júzindegi bankrottyq» sheginde turǵanyn, al osy qaryz boıynsha paıyzdyq tólemder qazir barlyq salyq túsimderiniń 25 paıyzyn quraıtynyn eskertti.

Masktyń aıtýynsha, «eger bul jalǵasa berse» barlyq salyq túsimderi saıyp kelgende memlekettik qaryzǵa qyzmet kórsetýge jumsalatynyn jáne «basqa eshteńege eshteńe qalmaıdy».

Osylaısha, AQSh úkimetiniń jalpy kirisindegi 5 trln dollardyń paıyzdyq tólemderi qazirgi kezde 1,2 trln dollardy qurap otyr, al úkimet jyl saıyn 7 trln dollar jumsaýdy jalǵastyryp keledi, bul únemi ósip kele jatqan tapshylyqqa ákelip otyr.

Ekonomıst Pıter Shıff Masktyń jazbasyna AQSh-tyń qazirdiń ózinde bankrotqa ushyraǵanyn jáne «bul bizdiń kredıtorlarymyzǵa anyq bolǵansha ýaqyt máselesi» dep jaýap berdi. Odan keıin Shıff «paıyzdyq mólsherlemeler joǵarylaıtyny sonsha», qaryzǵa qyzmet kórsetý shyǵyndary jalpy salyq túsiminen asyp túsetinin eskertti.

Buǵan deıin Ilon Mask X áleýmettik jelisinde respýblıkashyldardyń zań jobasyn qatal synǵa alǵanyn jazǵan bolatynbyz.