AQSh-tyń Kentýkkı shtatyndaǵy sý tasqynynan 4 adam qaza tapty
ASTANA. KAZINFORM – AQSh-tyń Kentýkkı shtatynda nóser jańbyrdan keıin bolǵan sý tasqyny saldarynan keminde tórt adam qaza tapty.
Bul týraly Anadolu agenttigi habarlady.
AQSh Ulttyq meteorologııalyq qyzmeti Kentýkkı men Indıana shtattarynyń birqatar aýdanynda kenetten bolatyn sý tasqyny qaýpine baılanysty eskertý jarııalady.
Kentýkkı shtatynyń gýbernatory Endı Beshırdiń málimdeýinshe, Medıson jáne Djekson okrýgterinde bolǵan sý tasqyny tórt adamnyń ómirin qıǵan.
«Nóser jaýynnan keıin bolǵan sý tasqyny saldarynan Medıson jáne Djekson okrýgterinde tórt adam qaza tapty. Sondaı-aq shtattaǵy 12 avtojoldy sý basyp, kólik qozǵalysyna jaramsyz bolyp qaldy», – dedi Endı Beshır X áleýmettik jelisindegi paraqshasynda.
Gýbernator turǵyndardy qarańǵy ýaqytta nemese kórý múmkindigi shekteýli jaǵdaıda jolǵa shyqpaýǵa shaqyrdy.
Medıson okrýgi ákimshiliginiń ókili Karlos Koıldyń aıtýynsha, izdestirý-qutqarý jumystary jalǵasyp jatyr. Keıbir aýdandarǵa qutqarýshylar áli jete almaı otyr.
Al Býllıtt okrýginde aýyldyq aýmaqta kóshkin júrýine baılanysty jergilikti bılik turǵyndardy evakýatsııalaý týraly sheshim qabyldady.
Aıta keteıik, Germanııada buryn-sońdy bolmaǵan aptap ystyq tirkeldi.
