AQSh-tyń Qazaqstandaǵy jańa elshisi qazaq tilinde sóıledi
ASTANA. KAZINFORM – AQSh-tyń Qazaqstandaǵy dıplomatııalyq mıssııasy óziniń Instagram akkaýntynda AQSh-tyń Qazaqstandaǵy elshisi Djýlı Staffttyń qazaqstandyqtarǵa qazaq tilinde úndeýiniń beınesin jarııalady.
Elshi óz sózin qazaq tilinde bastady.
- Qurmetti dostar, áriptester jáne qazaqstandyqtar! Meniń atym Djýlı Stafft. AQSh-tyń Qazaqstandaǵy elshisi bolyp qyzmet etý men úshin úlken qurmet, - dedi dıplomat.
Beınejazbada ol óz sózin aǵylshyn tilinde jalǵastyryp, josparlary týraly baıandady. Atap aıtqanda, dıplomat Qazaqstan men AQSh arasyndaǵy mádenıet pen bilimnen bastap saýda men jasandy ıntellektige deıingi ártúrli salalarda ekijaqty qarym-qatynasty odan ári damytý nıeti týraly málimdedi.
- Bul eki memleket úshin de ózara tıimdi saýda, ınvestıtsııa jáne kásipkerlik bastamalardy qoldaýǵa kómektesedi, - dep atap ótti ol.
Eske sala ketsek, ótken jyldyń qazan aıynda AQSh Senaty Djýlı Stafftty AQSh-tyń Qazaqstandaǵy kelesi elshisi etip bekitti.
Qańtar aıynyń basynda Aqorda rezıdentsııasynda AQSh elshisi Djýlı Stafft pen Bolgarııa elshisi Georgı Vodenskıdiń Qazaqstan Prezıdentine senim gramotalaryn tapsyrý rásimi ótti.