AQSh-tyń Qazaqstandaǵy elshisi ımmıgratsııalyq vıza berýdiń ýaqytsha toqtatylýyn túsindirdi

ASTANA. KAZINFORM – Qazaqstandaǵy AQSh elshisi Djýlı Stafft Astanada ótken baspasóz máslıhatynda Diversity Visa baǵdarlamasy boıynsha ımmıgratsııalyq vızalar berýdiń ýaqytsha toqtatylýyna qatysty jýrnalısterdiń suraǵyna jaýap berdi, dep habarlaıdy Kazinform agenttiginiń tilshisi. 

Elshi AQSh-tyń ımmıgratsııa negizinde qurylǵan el ekenin atap ótti.

— Kópshilik munyń qanshalyqty mańyzdy ekenin jáne onyń zańnamada naqty bekitilgenin jaqsy túsinedi dep oılaımyn, — dedi ol.

Onyń aıtýynsha, engizilgen úzilis ýaqytsha.

— Bul shara — baǵdarlamadaǵy úzilis — ýaqytsha ǵana jáne barlyq úderistiń tıisinshe jumys istep turǵanyna kóz jetkizýge baǵyttalǵan. Negizinen, bul ımmıgratsııalyq júıeni toqtatý emes, kerisinshe ony qoldaý, — dedi Stafft.

Elshi mundaı áreket buǵan deıin de jasalǵanyn jáne sheshim ótinish berýshilerdiń shekteýli bóligine ǵana qatysty ekenin eske saldy.

— Bul úzilis vızanyń bir sanatynyń naqty bir bóligine qatysty jáne Qazaqstan azamattaryna beriletin vızalardyń basym kópshiligine áser etpeıdi, — dedi ol.

Stafft basqa sapar túrleri, ásirese bilim alý baǵytyndaǵy múmkindikter ashyq kúıinde qalatynyn atap ótti. Ótken jyly AQSh-ta bilim alǵan qazaqstandyq stýdentter sany rekordtyq deńgeıge jetken, ári amerıkalyq tarap bul kórsetkishtiń aldaǵy ýaqytta da ósetinine úmit bildirip otyr.

Óz jumysynyń basymdyqtary týraly aıta kele, elshi mádenı baılanystardy nyǵaıtýdyń mańyzyn erekshe atap ótti.

— Biz qazaqstandyqtardyń kóbirek AQSh-qa barǵanyn, al amerıkalyqtardyń Qazaqstanǵa jıirek kelgenin qalaımyz. Bizdiń elderimizdiń uqsastyqtary kóp, sondyqtan azamattardyń muny óz kózimen kórgeni mańyzdy. Jeke baılanystar alys qashyqtyqqa qaramastan senimdi seriktestikter qurýǵa kómektesedi, — dep túıindedi ol.

Buǵan deıin AQSh-ta 75 eldiń azamattary úshin ımmıgratsııalyq vızalardy óńdeý ýaqytsha toqtatylǵany habarlanǵan bolatyn.