AQSh-tyń Qazaqstandaǵy elshisi Danıel Rozenblıým otstavkaǵa ketti
ASTANA. KAZINFORM – AQSh-tyń Qazaqstandaǵy elshisi Denıel Rozenblıým 26 qarashada Qazaqstan úkimetine AQSh Memlekettik departamentindegi 28 jylǵa jýyq tabysty mansabyn 2025 jyldyń 20 qańtarynda aıaqtaıtynyn málimdedi, dep habarlaıdy Qazaqstannyń AQSh-taǵy Elshiliginiń baspasóz qyzmeti.
Elshi Rozenblıým Qazaqstandaǵy Ókildiktiń basshysy qyzmetin 2022 jyldyń qarashasynan beri atqardy. AQSh-tyń bes prezıdenttik ákimshiligi men segiz memlekettik hatshy laýazymynda qyzmet etken ol kórnekti mansabyn aıaqtaý týraly sheshim qabyldady. Ol Amerıka Qurama Shtattary myqty ári damyp kele jatqan áriptestik qarym-qatynasyn qurǵan el – Qazaqstanda AQSh atynan ókildik etý múmkindigine rızashylyǵyn bildirdi.
Elshi Rozenblıýmniń jetekshiligimen AQSh pen Qazaqstan arasyndaǵy qarym-qatynas órkendep, saýda men ınvestıtsııada, adamdar arasyndaǵy qarym-qatynasta, ýnıversıtetterdegi seriktestikte jáne qaýipsizdik salasyndaǵy yntymaqtastyqta aıtarlyqtaı jetistikterge qol jetkizildi. Qazaqstandaǵy AQSh mıssııasynyń arnaıy komandasymen tyǵyz jumys isteı otyryp, ol dıplomatııalyq baılanystardy nyǵaıtty, ózara túsinistikti arttyrdy jáne eki eldiń strategııalyq múddelerin alǵa tartty.
«Men úshin Qazaqstandaǵy AQSh elshisi qyzmetin atqarý úlken mártebe boldy. Ásirese, qazaq halqyn jaqynyraq tanyp, eldiń barlyq aımaǵyn aralap, onyń qaıtalanbas tarıhynan mol maǵlumat alǵanyma qýanyshtymyn. Osynda jumys isteý barysynda mende Qazaqstannyń mádenıeti men dástúrine degen tereń qurmet qalyptasty», - dedi Elshi Rozenblıým.