AQSh-tyń Karıb teńizinde katerge jasaǵan soqqysynan tórt adam qaza tapty
ASTANA. KAZINFORM – AQSh Qarýly kúshteriniń Ońtústik qolbasshylyǵy Karıb teńizinde esirtki tasymaldaý úshin paıdalanylatyn baǵytpen júrgen júrdek katerge soqqy jasalǵanyn málimdedi, dep habarlaıdy DW.
AQSh tarapynyń málimetinshe, operatsııa 19 qyrkúıekte júrgizilgen. Áskerı qolbasshylyq katerdiń esirtki tasymalyna qatysy bar ekenin barlaý derekteri rastaǵanyn habarlady.
– Naqty barlaý derekteri bul kemeniń esirtki tasymalyna qatysy bar ekenin rastady. Operatsııa barysynda tórt esirtki terrorısti joıyldy, – delingen AQSh Ońtústik qolbasshylyǵynyń málimdemesinde.
Áleýmettik jelide jarııalanǵan kadrlardan qozǵalyp bara jatqan katerdi kenetten jarqyl sharpyp, keıin onyń kórinbeı qalǵanyn baıqaýǵa bolady.
Alaıda amerıkalyq áskerıler katerdiń zańsyz esirtki aınalymyna qatysy bolǵanyn rastaıtyn qosymsha dálelder usynbaǵan.
Buǵan deıin bıyl kóktemde AQSh Karıb teńizi men Tynyq muhıtynda esirtki tasymaldaǵan 47 kemeni joıǵany habarlanǵan.
