AQSh-tyń Izraılmen janjalǵa aralasýy Iranǵa soqqyny kúsheıtedi - saıasattanýshy
ASTANA. KAZINFORM – Saıasattanýshy Sultan Ákimbekov Iran men Izraıl arasyndaǵy qaqtyǵysqa qatysty pikir bildirdi.
- Irannyń atom bombasyn óndirýge qanshalyqty jaqyn qalǵanyn aıtý qıyn. Ártúrli kózqaras bar. Keıbireýler qazirdiń ózinde Irannyń ýrandy 60 paıyzǵa deıin baıyta alǵanyn alǵa tartady. 5 maýsymda Aıatolla Hameneı Iran ýrandy 60 paıyzǵa deıin baıytý oıynan bas tartpaıtyndyǵyn málimdegeni bar. Bálkim, ol oryndalǵan da shyǵar. Іs júzinde ýrandy 60 paıyzdan 90 paıyzǵa deıin baıytý shartty túrde 5 paıyzǵa deıin baıytýdan áldeqaıda jeńil. 12 maýsymda MAGATE mamandary jekeleı alynǵan úlgilerden baıytý deńgeıiniń 80 paıyzǵa deıin jetkeni anyqtalǵanyn málimdegen edi. Bul - qarý jasaý deńgeıine óte jaqyn degen sóz. Soǵan oraı Izraıl Iran atom bombasyn jasaýǵa jaqyn qaldy dep sanaǵany anyq, - deıdi saıasattanýshy.
Onyń atap ótýinshe, Izraılde Irannyń ýrandy baıytý deńgeıine qatysty barlaý málimetteri de bolýy yqtımal. 13 maýsymda ırandyq áskerı basshylyq pen ıadrolyq tehnologııalar boıynsha mamandarǵa dál soqqy jasaý da Izraıldiń qolynda Irannyń ishki jaǵdaıyna qatysty naqty aqparattyń bar eken bildiredi.
- Izraıl 13 maýsymda Iranǵa tek qana soqqy jasap qoımaı, sonymen qatar oǵan qarsy uzaq merzim áýeden shabýyldaý operatsııasyn júrgizbek. Tel-Avıv Iranǵa 14 kún boıy shabýyl jasaýdy josparlap otyrǵanyn málimdedi. 200 shabýyldaǵysh ushaq bolǵannyń ózinde, tipti Izraıl men Irandy bólip jatqan 1 500 shaqyrymdy eńsergenniń ózinde 2 apta boıy áýeden shabýyl jasaý óte kóp, - deıdi Sultan Ákimbekov.
Sarapshy Izraıl qarymta soqqyǵa daıyn bolǵanyn aıtady.
- Irannyń qýatty zymyran áskeri, sonymen qatar shabýyldaýshy kóptegen ushqyshsyz apparaty bar. Onda 2 myńnan 3 myńǵa deıin ballıstıkalyq zymyran bar dep eseptelinedi. Tegeran 13 maýsym kúni keshkisin qarymta shabýyl jasady. Degenmen, shabýylǵa qarymta jaýap turǵysynan aıtar bolsaq, onda óte uzaqqa sozylyp ketti. Buǵan 13 maýsym kúni armııa men Islam revolıýtsııasy saqshylar korpýsynyń kóptegen komandıriniń mert bolýy sebep, - dedi ol.
Sultan Ákimbekov Iran qarymta shabýyl kezinde 100-den 200-ge deıin zymyran ushyrǵanyn, onyń keıbiri Izraıldiń áýe qorǵanys kúshi júıesin buzyp ótkenin aıtady.
- Bul jaǵdaıda Irannyń múmkindigi kóp emes. Іs júzinde ol amerıkalyq bazaǵa, máselen kórshiles Iraktaǵy jáne Parsy shyǵanaǵyndaǵy ózge arab elderindegi bazalarǵa soqqy jasaýǵa tyrysýy múmkin. Biraq, AQSh-tyń eń iri bazasy Taıaý Shyǵystyń jergilikti geosaıası alańynda eń mańyzdy oıynshylardyń biri sanalatyn Qatarda ornalasqan. Qatar belgili bir deńgeıde Irannyń áli de paıdasyna jaraıdy. Munyń ústine, Qatardyń Tegeranmen barlyq ýaqytta da tyǵyz baılanysy boldy. Biraq, eń mańyzdysy AQSh-tyń janjalǵa aralasýy Iranǵa soqqyny kúsheıte túsedi. Salmaǵy 13 tonna bolatyn amerıkalyq býnkerge qarsy bombany paıdalaný Tegeran úshin basty problemaǵa aınalary sózsiz. Izraılde mundaı bomba da, ony tasymaldaı alatyn ushaq ta joq. Sondyqtan ol baıytylǵan ýran saqtaýly turǵan Frododaǵy jerasty ortalyǵyn joıa almaı otyr, - dedi ol.
Osyǵan deıin Tramptyń Izraıl men Iran arasynda beıbitshilik ornatýǵa ýáde bergeni týraly jazǵan edik.