AQSh-tyń Iranǵa jańa soqqylarynan keıin munaı baǵasy kúrt ósti
ASTANA. KAZINFORM – AQSh-tyń Irandaǵy nysandarǵa jańa soqqy jasaýyna baılanysty álemdik munaı barreliniń baǵasy bir dollardan astam somaǵa qymbattady, dep habarlaıdy Reuters.
Sársenbi kúni munaıdyń eki negizgi etalondyq markasy sońǵy eki aptadan astam ýaqyttaǵy eń joǵary deńgeıde jabyldy. Buǵan AQSh prezıdenti Donald Tramptyń Iranǵa qarsy jańa soqqylar jasalýy múmkin ekenin málimdeýi áser etti.
Sonymen qatar Tramp Iranmen ýaqytsha jasalǵan soǵysty toqtatý týraly kelisimniń «aıaqtalǵanyn» aıtqanymen, tolyq aýqymdy soǵys bolmaıtynyn jetkizdi.
Brent markaly munaı fıýchersteri bir barreline 79,28 dollarǵa deıin kóterildi. Saýda sessııasynyń sońynda bul kórsetkish 5 paıyzdan astam ósip, 78,02 dollardy qurady.
Al amerıkalyq West Texas Intermediate (WTI) markaly munaı fıýchersteriniń bir barreliniń baǵasy 74,76 dollarǵa jetti. Bul aldyńǵy sessııadaǵy 73,52 dollarlyq jabylý baǵasynan joǵary.
AQSh Qarýly kúshteriniń Ortalyq qolbasshylyǵy (CENTCOM) sársenbi kúni Ormýz buǵazy arqyly kemelerdiń kedergisiz qozǵalysyn qamtamasyz etý maqsatynda Iranǵa qarsy jańa soqqylar bastalǵanyn habarlady.
Reuters agenttigine pikir bildirgen amerıkalyq sheneýniktiń aıtýynsha, AQSh-tyń bul jolǵy operatsııasy seısenbi kúngi shabýyldardan aýqymdyraq bolady.
Irandyq buqaralyq aqparat quraldary Bender-Abbas, Ábý-Mýsa, Býsher jáne eldiń basqa da aýdandarynda jarylystar bolǵanyn habarlady.
Jańa soqqylar Ormýz buǵazyndaǵy kemelerge Iran jasaǵan shabýyldardan keıingi shıelenistiń kúsheıýinen soń jasaldy. Osy oqıǵalardan keıin AQSh ótken aıda taraptar arasyndaǵy ýaqytsha kelisim aıasynda qabyldanǵan Iran munaıyn satýǵa qatysty sanktsııalardy jeńildetý týraly sheshimniń kúshin joıdy.
Sársenbi kúni Iran Bahreın men Kýveıttegi amerıkalyq áskerı nysandarǵa soqqy jasaǵanyn málimdedi. Buǵan jaýap retinde AQSh jańa shabýyldar uıymdastyrdy.
Iranmen qaqtyǵys bastalǵanǵa deıin Ormýz buǵazy arqyly álemdik munaı jetkiziliminiń shamamen besten biri tasymaldanatyn. Sondyqtan Tegerannyń osy teńiz jolyn baqylaýy qaqtyǵystaǵy negizgi tetikterdiń biri sanalady.
Seısenbi kúni eki tankerge jasalǵan shabýyldan keıin teńiz qaýipsizdigi organdary Ormýz buǵazy arqyly ótetin kemeler úshin qaýip deńgeıin «eleýli» deńgeıge deıin kóterdi.
Aıta keteıik, AQSh áskeri Irandaǵy nysandarǵa kezekti ret soqqy jasaǵanyn jazdyq.
