AQSh-tyń Irandaǵy ıadrolyq nysandardy bombalaýy aımaq úshin «qaýipti burylysty» bildiredi — BUU
ASTANA. KAZINFORM — Jeksenbi kúni BUU Qaýipsizdik Keńesi Irannyń suranysy boıynsha bul eldiń ıadrolyq nysandaryna jasalǵan sońǵy soqqylarǵa baılanysty shuǵyl otyrys ótkizdi, dep habarlaıdy Kazinform.
Jıynda sóz sóılegen BUU Bas hatshysy Antonıý Gýterrısh Qurama Shtattardyń Irannyń ıadrolyq nysandaryn bombalaýy aımaq úshin «qaýipti burylysty» bildiretinin málimdedi.
— Álem de osy qaýipti qaqtyǵystyń saldarynan qutyla almaıdy, — dep qosty Bas hatshynyń saıası máseleler jónindegi kómekshisi Mıroslav Encha.
«Dıplomatııa jeńýi kerek»
Gýterrısh Taıaý Shyǵystaǵy kez kelgen áskerı shıelenisti taǵy da aıyptap, «jaýap soqqylar tizbegine ulasý qaýpi» bar ekenin eskertti.
— Munyń aldyn alý úshin dıplomatııa basym bolýy kerek, — dedi Bas hatshy.
Encha Iran parlamentiniń jahandyq energııa tranzıtiniń eń mańyzdy teńiz baǵyty — Ormýz buǵazyn jabý sharalaryn biraýyzdan qoldaǵanyn atap ótti. Bul másele boıynsha sońǵy sheshimdi Irannyń Ulttyq qaýipsizdik joǵary keńesi qabyldaýy kerek.
— Men teńizde júzýge qatysty halyqaralyq quqyq boıynsha barlyq memleketterdiń quqyqtary men mindetterin eske salamyn, — dedi Bas hatshynyń kómekshisi.
BUU basshysy teńizde qaýipsiz keme qatynasy qamtamasyz etilýi kerek ekenin atap ótti.
Gýterrısh soǵys qımyldaryn dereý toqtatyp, Irannyń ıadrolyq baǵdarlamasy boıynsha kelissózdi qaıta bastaýǵa shaqyrdy. Onyń málimdeýinshe, Iran ıAdrolyq qarýdy taratpaý týraly kelisimdi oryndaýy jáne BUU-ǵa múshe barlyq el Jarǵy men halyqaralyq quqyq, sonyń ishinde halyqaralyq gýmanıtarlyq quqyq normalary aıasyndaǵy óz mindettemelerine sáıkes áreket etýi kerek.
— Bizge senimge ıe bolatyn, jan-jaqty jáne tekseriletin — MAGATE ınspektorlarynyń tolyq qoljetimdiligin qosa alǵanda senimdi qalpyna keltiretin sheshim kerek. Qazir biz kúrdeli tańdaýdyń aldynda turmyz. Bir jol — aýqymdy soǵysqa aparady… ekinshisi — jaǵdaıdy báseńdetýge, dıplomatııa men dıalogqa bastaıdy. Biz qaı joldyń durys ekenin bilemiz, — dep qorytyndylady ol.
Eske sala ketsek, AQSh prezıdenti Donald Tramp Irannyń ıadrolyq ınfraqurylymyna qarsy júrgizilgen «óte sátti» áskerı operatsııa týraly málimdedi.
BUU Qaýipsizdik Keńesi AQSh-tyń Iranǵa soqqy jasaýyna baılanysty shuǵyl jınalys ótkizdi.