AQSh-tyń Grenlandııany baqylaýyna qarsy elderge baj salyǵy engizilýi múmkin

ASTANA. KAZINFORM – Donald Tramp AQSh-tyń Grenlandııaǵa qatysty ustanymyn qoldamaıtyn elderge kedendik baj salyǵyn engizýi múmkin ekenin málimdedi, dep habarlaıdy DW.

– Eger elder Grenlandııa máselesinde AQSh-ty qoldamasa, olarǵa baj salyǵyn engizýim múmkin. Sebebi Grenlandııa bizge ulttyq qaýipsizdik úshin qajet. Sondyqtan men osylaı áreket ete alamyn, – dedi Donald Tramp.

Sonymen qatar ol ózin «baj salyǵynyń koroli» dep atady.

Grenlandııaǵa qatysty bul málimdeme AQSh Kongresiniń eki partııa ókilderinen quralǵan delegatsııasynyń Danııa astanasy Kopengagenge sapary aıasynda aıtyldy. Delegatsııanyń maqsaty – taraptar arasyndaǵy shıelenisti báseńdetý.

Sondaı-aq Germanııa «Arctic Endurance» («Arktıkalyq tózimdilik») mıssııasy aıasynda Grenlandııaǵa býndesverdiń barlaý tobyn jibergeni habarlandy. Áskerı qyzmetshiler Danııanyń shaqyrýymen NATO-daǵy seriktes elge áskerı qoldaý kórsetý múmkindikterin, onyń ishinde teńiz monıtorıngi salasyndaǵy áleýetti zerdelep jatyr. Dat basshylyǵymen ótetin mıssııaǵa Frantsııa, Shvetsııa jáne Norvegııa sarbazdary da qatysýda.

Buǵan deıin Danııa men AQSh Grenlandııa máselesi boıynsha kelisimge kele almaǵany habarlanǵan bolatyn.