AQSh-tyń eń yqpaldy tulǵalarynyń tizimi jarııalandy
ASTANA. KAZINFORM — Vanity Fair jýrnaly AQSh-tyń «jańa elıtasynyń» tizimin jasady, onyń basynda OpenAI kompanııasynyń bas dırektory Sem Altman tur, ol SpaceX kompanııasynyń bas dırektory Ilon Maskty, vıtse-prezıdent Dj.D. Vensti jáne Memlekettik hatshy Marko Rýbıony basyp ozǵan, dep habarlaıdy Kazinform agenttiginiń Vashıngtondaǵy menshikti tilshisi Vanity Fair basymylyna silteme jasap.
Qazir Amerıkadaǵy eń yqpaldy tulǵa — álemdi ózgerte alatyn jandardyń biri, OpenAI kompanııasynyń bas dırektory Sem Altman. 37 jasynda ol jasandy ıntellekt revolıýtsııasynyń sımvolyna aınalǵan ChatGPT-ny iske qosty, al OpenAI damyp kele jatqan saladan oıyp turyp oryn alady. Basylymnyń jazýynsha, keleshek urpaq Altmandy kezinde bolashaqty ózgertken tulǵa Robert Oppengeımermen salystyrýy múmkin.
Anthropic kompanııasynyń bas dırektory Darıo Amodeı ekinshi orynda. Ol shyǵaratyn Anthropic ónimderiniń, ásirese Claude Code baǵdarlamasynyń tanymal bolǵany sonshalyq, tipti úkimetpen daýlasqanyna qaramastan kompanııanyń pozıtsııasy nyǵyzdala túsken. Investorlar Amodeıdiń qubylmaly kezeńde áreket etýge daıyndyǵyn jáne jasandy ıntellektti izgilik jolynda paıdalanýǵa degen umtylysyn atap ótedi.
Tesla jáne SpaceX kompanııalarynyń bas dırektory Ilon Mask úzdik úshtikti túıindedi.
Ol áleýmettik jelini, jasandy ıntellekt bıznesin jáne zymyran-ǵarysh kompanııasyn biriktirip, «balamaly kapıtalızm» dep atalatyn model jasady. Dástúrli qarjylyq kórsetkishteriniń turaqsyzdyǵyna qaramastan, onyń yqpaly, kapıtalǵa qol jetkizý múmkindigi jáne tanymaldyǵy mamandar men ınvestorlardy tartýǵa kómektesedi. Masktyń basty artyqshylyǵy, ol batyl ıdeıalardy ómirsheń jobalarǵa aınaldyra alady. Qaıta paıdalanýǵa bolatyn zymyrandar men elektr kólikteri qazirdiń ózinde aıtarlyqtaı paıda ákelýde, al onyń bedeli talantty qyzmetkerlerdi tartýǵa kómektesedi.
2010 jyldardyń basynda Nvidia kompanııasynyń bas dırektory Djensen Hýan táýekelge bel býyp, jasandy ıntellekt úshin qajet grafıkalyq protsessorlardy damytýǵa kúsh saldy. Ýaqyt óte, onyń úmiti aqtalyp, tabysqa keneldi. Nvidia jasandy ıntellekt chıpteri naryǵynyń aıtarlyqtaı úlesin jaýlap aldy jáne jasandy ıntellekttiń damýynan paıda kórip otyrǵan basty tulǵalardyń birine aınaldy.
Úzdik bestikten Federaldy rezerv tóraǵasy Kevın Ýorsh ta oryn aldy. Onyń qabyldaıtyn sheshimderi dollardyń qunyna jáne AQSh-tyń ekonomıkalyq saıasatyna, sonyń ishinde ınflıatsııa men retsessııaǵa qarsy kúreske tikeleı áser etedi. Ýorshtyń amerıkan qarjy jáne saıası elıtasymen baılanysy bar, onyń taza baılyǵy 135 mıllıon dollardan asady.
AQSh vıtse-prezıdenti Dj.D. Vens altynshy orynda. Popýlıstik stıli men BAQ-tyń qoldaýynyń arqasynda ol tez arada qazirgi bıliktiń kórnekti tulǵasyna aınaldy. Tramp ony murager retinde qarastyrady.
Kelesi orynda — AQSh Memlekettik hatshysy Marko Rýbıo. Ol Tramp ákimshiliginde keń ókilettikterge ıe boldy jáne AQSh syrtqy saıasatyndaǵy eń yqpaldy tulǵalardyń birine aınaldy. Ákimshiliktiń daýly sheshimderi men tanymaldylyǵynyń tómendeýine qaramastan, Rýbıoǵa qoǵam oń qabaqpen qaraıdy, ári 2028 jylǵy prezıdenttik naýqan aldynda kórnekti tulǵanyń biri bolyp otyr.
Alǵashqy ondyqqa, sondaı-aq Alphabet jáne Google kompanııasynyń bas dırektory Sýndar Pıchaı, Netflix bas dırektory Ted Sarandos jáne YouTube bas dırektory Nıl Mohan bar.
«Jańa elıta» tizimine 50 adam kirgizilgen. Olardyń arasynda AQSh prezıdentiniń eki balasy Kishi Donald Tramp pen Ivanka Tramp, AQSh prezıdentiniń kúıeý balasy Djared Kýshner de bar.
Basqa kandıdattardyń qatarynda Nıý-Iork qalasynyń meri Zoran Mamdanı (demokrat), Kalıfornııa gýbernatory Gevın Nıýsom (demokrat) jáne Rım Papasy XIV Lev esimderi atalady.
Buǵan deıin Lýızıana shtatynan saılanǵan respýblıkashyl senator Djon Kennedı 2028 jylǵy prezıdent saılaýyna qatyspaq oıy baryn aıtqan bolatyn.
