AQSh-tyń Djordjııa shtatyndaǵy Hyundai zaýytynda 475 adam ustaldy
ASTANA. KAZINFORM — AQSh-tyń Immıgratsııalyq jáne kedendik baqylaý qyzmeti (ICE) Djordjııa shtatyndaǵy Hyundai kompanııasyna tıesili elektromobıl akkýmýlıatorlaryn óndiretin zaýytta reıd júrgizip, 475 adamdy ustady, dep jazady Anadoly.
AQSh-tyń Іshki qaýipsizdik mınıstrliginiń málimetinshe, operatsııa Federaldy tergeý bıýrosy (FBR) men shtattyq polıtsııamen birlesip júrgizilgen.
Ellabell qalasyndaǵy kásiporynǵa reıd «jumysqa zańsyz ornalastyrý jáne ózge de aýyr federaldyq qylmystar boıynsha júrip jatqan qylmystyq tergeý aıasynda» ótken.
Reıd federaldy sýdıanyń sanktsııasymen júzege asqan. Ustalǵandardyń kópshiliginiń vızalarynyń merzimi ótip ketkeni nemese AQSh aýmaǵynda zańsyz júrgeni anyqtalǵan.
Sonymen qatar, ustalǵandardyń basym bóligi tek Hyundai emes, ártúrli deldal kompanııalardyń qyzmetkerleri bolǵany atap ótildi.
Al Hyundai kompanııasy bul jaǵdaıdy muqııat baqylaýda ustap otyrǵanyn jáne naqty mán-jaılardy anyqtaý boıynsha jumys júrgizip jatqanyn habarlady.
— Bizdiń derekterimizge sáıkes, ustalǵandardyń eshqaısysy Hyundai Motor Company-diń tikeleı qyzmetkeri emes, — delingen kompanııa málimdemesinde.
Osydan buryn AQSh-tyń Jol qozǵalysy qaýipsizdigi jónindegi ulttyq basqarmasy (NABDD) beısenbi kúni Ford markaly 500 myńǵa jýyq avtokólikti tejeý júıesindegi suıyqtyqtyń aǵýyna baılanysty keri qaıtaryp jatqanyn málimdedi.