AQSh-tyń «Djerald Ford» ushaqtasyǵyshy Karıb teńizinde qandaı operatsııa júrgizedi
ASTANA. KAZINFORM — AQSh Qarýly kúshteriniń Ońtústik qolbasshylyǵy (SOUTHCOM) USS Gerald R. Ford ushaq tasyǵyshy áskerı-teńiz qorǵaýshylarymen birge Karıb teńizine kirgenin jine «transulttyq uıymdasqan qylmys» pen «narkoterrorızmge» qarsy operatsııalar júrgizetinin habarlady. Bul týraly ıtalııalyq Agenzia Nova jazdy.
«Іsimizge degen tabandy adaldyǵymyzdyń jáne kúshterimizdi maqsatty qoldanýymyzdyń arqasynda biz óńirimizdi turaqsyzdandyrýǵa baǵyttalǵan transulttyq qaterlerge qarsy kúresýge daıynbyz», — dedi Ońtústik qolbasshylyǵynyń qolbasshysy admıral Elvın Holsı. «USS Gerald R. Ford bastaǵan ushaq tasyǵyshtar tobynyń ornalastyrylýy — Batys jarty shardyń jáne bizdiń Otanymyzdyń qaýipsizdigin qorǵaýdaǵy tabandylyǵymyzdy nyǵaıtýdaǵy mańyzdy qadam», dep qosty ol.
«USS Gerald R. Ford» ushaq tasyǵyshynyń basqa áskerı-teńiz ushaqtarymen birge Karıb teńizine kirýi — qyrkúıek aıynyń basynan beri Aq úı júzege asyryp kele jatqan strategııanyń bir bóligi. Bul strategııa «esirtki terrorısterine» qarsy áskerı resýrstardy paıdalanýdy kózdeıdi (AQSh Qorǵanys mınıstrligi keminde 80 esirtki saýdageriniń joıylǵanyn habarlaǵan).
Degenmen álemdik BAQ-ta bul áskerı áreketter Nıkolas Madýroǵa qysym kórsetý, ony Venesýela basshysy qyzmetinen ketýge májbúrleý áreketi retinde keńinen tarady. Osyǵan oraı, Tramp ákimshiliginde Karakasta qandaı sharalar qoldaný kerektigi jóninde qyzý keńesý júrip jatyr.
AQSh prezıdenti Donald Tramp bul talqylaýlar boıynsha «sheshim qabyldaǵanyn», biraq ázirge jarııalaı almaıtynyn aıtty. Madýro bul «egemendikke qaýip tóndiretin» áreketterdi aıyptap, oǵan ishki oppozıtsııany da, Vashıngtonmen birlesken oqý-jattyǵýlarǵa kelisip otyrǵan Karıb basseıni elderin de aıyptap, qaýipsizdik pen qorǵanys kúshteriniń turaqty mobılızatsııasyn jarııalady.
Aıta keteıik, buǵan deıin AQSh-tyń ushaq tasyǵysh kemeleri Karıb teńizi aıdynyna engenin jazdyq.