AQSh-tyń burynǵy prezıdentteri Chıkagodaǵy Obama ortalyǵyn ashty
ASTANA. KAZINFORM – AQSh-tyń 44-prezıdenti Barak Obama Chıkagoda óziniń prezıdenttik ortalyǵyn resmı túrde ashyp, demokratııany qorǵaýǵa shaqyrdy. Onymen birge ashylý saltanatynda eldiń burynǵy úsh prezıdenti – Djo Baıden, kishi Djordj Býsh jáne Bıll Klınton jubaılarymen qatysty, dep habarlaıdy Associated Press.
Zaldaǵy kórermender arasynda burynǵy vıtse-prezıdent Kamala Harrıs, Demokratııalyq partııanyń kóptegen jetekshi ókilderi, álemdik deńgeıdegi óner juldyzdary, sportshylar jáne basqa da tanymal tulǵalar boldy.
– Bul ortalyq bizdiń demokratııamyzdyń qanshalyqty erekshe ári qymbat qundylyq ekenin dáleldeıtin orynǵa aınalady dep úmittenemin. Sondaı-aq ol azamattyq jaýapkershilikti birge arqalaǵan kezde qandaı jetistikterge jete alatynymyzdy eske salady, – dedi AQSh tarıhyndaǵy alǵashqy qara násildi prezıdent.
Qazirgi prezıdent Donald Tramptyń joqtyǵy kózge birden tústi. Sonymen qatar is-sharada sóz sóılegenderdiń eshqaısysy onyń esimin atamady. Aqpan aıynda Tramp quny 850 mıllıon dollar bolatyn ortalyqty «úlken sátsizdik» dep ataǵan edi.
– Segiz jyl boıy ottyń ortasynda júrdiń, biraq eshqashan balqyp ketken joqsyń. Birde-bir ret onyń seni qatigez etýine jol bermediń. Álemdegi eń qıyn jumystyń ózin myna ásem saıabaqtaǵy serýen sııaqty kórsetip keldiń, – dedi Mıshel Obama jubaıyna qarata sóılegen sózinde.
Onyń sózderin tyńdap turǵan Barak Obama kózindegi jasty súrtip aldy.
Sahnaǵa sondaı-aq Bono, Djon Ledjend, Krıstına Agılera, Brıýs Sprıngstın jáne Stıvı Ýander shyqty. Shoýdy Stıvı Ýanderdiń Higher Ground áni qorytyndylady.
– Bul Obamalarǵa arnalǵan eskertkish emes, – dedi Obama qorynyń atqarýshy dırektory Valerı Djarrett. – Bul – osy joldy múmkin etken jandardyń bárine kórsetilgen qurmet.
Qalyń jurtshylyq ortalyqqa Juneteenth – Azattyq kúninen bastap kire alady. Bıletter qazan aıynyń sońyna deıin tolyq satylyp ketken. Aýmaǵy shamamen 20 akrdy quraıtyn kampýs jyl saıyn bir mıllıonnan astam kelýshini qabyldaýdy josparlap otyr.
Aıta keteıik, buǵan deıin Senat Tramptyń Aq úıdegi bal zalyna qarjy bólý týraly zań jobasyn qabyldamaı qoıǵanyn jazdyq.
