AQSh-tyń birjaqty tarıf engizýi DSU erejelerin óreskel buzý bolyp sanalady — Qytaı

ASTANA.KAZINFORM - Qytaı saýda protektsıonızminiń syn-qaterlerine jaýap berýge daıyn ekenin málimdedi, dep habarlaıdy Kazinform-nyń menshikti tilshisi.

Bul týraly beısenbi kúni Qytaı Halyq Respýblıkasy Saýda mınıstrliginiń resmı ókili He ıÝntsıan málimdedi.

- Qytaı múddeli eldermen yntymaqtasýǵa daıyn, erkin saýda men kópjaqtylyqty qoldaý úshin múddeli eldermen jumys isteýge jáne birjaqtylyq pen saýda protektsıonızminiń syn-qaterlerine birlesip jaýap berýge daıyn, - dedi He ıÝntsıan baspasóz máslıhatynda.

Ol AQSh-tyń Kanada men Meksıkadan keletin taýarlarǵa baj salyǵyn arttyrýdy keıinge qaldyrýyna pikir bildirdi.

Onyń aıtýynsha, AQSh-tyń bul áreketi erejelerge negizdelgen kópjaqty saýda júıesin, jahandyq ónerkásiptik jetkizý tizbeginiń turaqtylyǵyn buzady jáne jahandyq saýda shıelenisterin arttyrady.

Aıta keteıik, 1 aqpanda AQSh Qytaıdan keletin taýarlarǵa 10 paıyzdyq baj salyǵyn engizetinin habarlaǵan bolatyn. Óz kezeginde Qytaı Dúnıejúzilik saýda uıymyna shaǵym túsirdi. Qytaı da AQSh-tyń tarıfterine jaýap retinde kómir men suıytylǵan tabıǵı gazǵa 15% baj salyǵyn engizdi.