AQSh-tyń birqatar shtatynda «Fern» daýylyna baılanysty tótenshe jaǵdaı jarııalandy

ASTANA. KAZINFORM – AQSh-ta keıingi 100 jylda bolmaǵan qýatty «Fern» daýyly soǵyp jatyr, dep habarlaıdy DW.

Basylym málimetinshe, AQSh aýmaǵynyń edáýir bóligin basqan «Fern» daýyly saldarynan 13 myńnan astam áýe reısi toqtatylǵan. Boran, qar men jańbyr kem degende birneshe kún jaýyp turady degen boljam bar.

24 qańtardyń keshine qaraı tabıǵattyń tosyn minezinen 139 myńnan astam tutynýshyny jaryqsyz qaldy, bul kórsetkish ósip keledi. Elektr jaryǵy basym bóligi Tehas pen Lýızıana shtattarynda óshken. Nıý-Iork kóshelerinen aýa raıynyń kesirinen qaza tapqan úsh adamnyń máıiti tabyldy: jasy 67-degi jáne shamamen 30 jastaǵy er adam, sondaı-aq egde jastaǵy áıel.

Qolaısyz aýa raıyna baılanysty AQSh prezıdenti Donald Tramp Ońtústik Karolına, Vırdjınııa, Tennessı, Djordjııa, Soltústik Karolına, Merılend, Arkanzas, Kentýkkı, Lýızıana, Mıssısıpı, Indıana jáne Batys Vırdjınııa shtattarynda federaldyq deńgeıde tótenshe jaǵdaı rejımin engizd. Memleket basshysy azamattardy qaýipsizdik pen jylýdy saqtaýǵa shaqyrdy.

AQSh Іshki qaýipsizdik mınıstrliginiń deregine súıensek, asa kúrdeli meteorologııalyq jaǵdaı keminde 17 shtatta jáne Kolýmbııa okrýginde qalyptasqan. Al 12 shtatta daýyl saldaryn joıýǵa Ulttyq gvardııanyń bólimsheleri jumyldyryldy.

AQSh Ulttyq meteorologııalyq qyzmeti «Ferndi» «erekshe aýqymdy ári uzaqqa sozylatyn qysqy daýyl» dep atady. Sınoptıkter onyń saldarynan eldiń ońtústik-shyǵysynda qalyń muz qatyp, jekelegen aımaqtarda apatty jaǵdaılar bolýy múmkin ekenin eskertti.

Nıý-Iork meri Zohran Mamdanı bılik keminde 20–23 santımetr qar túsip, qańtardyń sońyna deıin sozylatyn aıaz bolady dep kútetinin málimdedi.

Aldyn ala boljam boıynsha, daýyl saldary AQSh-tyń 220 mıllıonnan astam turǵynyna tikeleı nemese janama túrde áser etýi yqtımal.

Eske sala keteıik, osyǵan deıin Frantsııada «Gorettı» daýyly saldarynan 92 myń úı jaryqsyz qalǵany týraly jazdyq.