AQSh-tyń bilim berý júıesi hakerlik shabýylǵa ushyrady
ASTANA. KAZINFORM — AQSh boıynsha joǵarǵy jáne orta bilim berý mekemeleri aýqymdy kıbershabýyldan keıin ýaqytsha qyzmetin toqtatýǵa májbúr boldy. Bul sabaq kesteleri men emtıhan ótkizý tártibine kedergi keltirdi, dep habarlaıdy Kazinform agenttiginiń Vashıngtondaǵy menshikti tilshisi NBC News aqparattaryna silteme jasap.
ıÝta shtatyndaǵy Instructure kompanııasy, Canvas platformasyn basqaratyn, buzýshylyqtyń saldaryn shekteý úshin «jedel sharalar» qoldanǵanyn jáne keıin quqyq qorǵaý organdaryna júgingenin málimdedi.
Canvas tsıfrlyq ınfraqurylymyn balalar baqshasynan bastap Lıganyń ýnıversıtetterine deıin 30 mıllıonnan astam belsendi qoldanýshy paıdalanady.
Muǵalimder platformany oqý materıaldaryn júkteý, stýdenttermen qarym-qatynas jasaý jáne baǵalardy qoıý úshin qoldanady. Stýdentter platformany qajetti oqý materıaldaryn qarap shyǵý, júkteý, tapsyrmalardy oryndaý jáne aıaqtalǵan jumystaryn tapsyrý úshin paıdalanady.
ShinyHunters hakerlik toby jeksenbi kúni jarııalaǵan málimdemesinde AQSh boıynsha 9 myń oqý ornynan Canvas júıesindegi shamamen 6,65 terabaıt derekterdi alǵanyn habarlady. Hakerler eger talaptary seısenbige deıin oryndalmasa, barlyq aqparat jarııalanady dep qaýip tóndirip otyr.
Osy oqıǵa amerıkalyqtar úshin ortalyqtandyrylǵan tsıfrlyq qyzmetterdiń yńǵaılylyǵyna qaýipsizdik táýekelderimen birge keletini jaıly oı týdyrdy.
— Bizdiń barlyq qarjy júıemiz osal, elektr jelilerimiz osal, ásirese kıbershabýyldar barǵan saıyn kúrdelenip kele jatqanda. Olar shyn máninde kóptegen máseleler týdyrýy múmkin jáne shabýyl jasaý maqsatynda paıdalanylýy yqtımal, — deıdi Aıova ýnıversıtetiniń saıası ǵylym professory Sara Mıtchell.
Eske sala ketsek, buǵan deıin hakerler Instagram qoldanýshylarynyń 17,5 mıllıon derekterin urlaǵany habarlanǵan bolatyn.
Al Booking.com-ǵa jasalǵan kıbershabýyldan keıin «brondaýdy buzý» arqyly jasalatyn alaıaqtyq shemalardyń kóbeıgenin baıqalǵan. Alaıaqtar urlanǵan derekterdi qoldanýshylardan aqsha bopsalaý úshin paıdalanady.
