AQSh-tyń bas prokýrory qyzmetine jańa úmitker usynyldy

ASTANA. KAZINFORM – Jańadan saılanǵan AQSh prezıdenti Donald Tramp bas prokýror laýazymyna Pem Bondıdi kandıdat retinde atady, dep habarlaıdy Kazinform-nyń menshikti tilshisi NBC News silteme jasap.

Donald Tramp Pem Bondıdi «esirtkiniń zańsyz aınalymymen» kúresý boıynsha jumysyn joǵary baǵalady. 2011-2019 jyldary Florıdanyń bas prokýrory qyzmetin atqarǵan Pem Bondı buǵan deıin Donald Tramptyń opıoıdtyq daǵdarysty toqtatý jáne esirtkige táýeldilikpen kúresý jónindegi komıssııasynda qyzmet atqarǵan.

Qazirgi ýaqytta ol «Ballard Partners» lobbıstik fırmasynyń seriktesi, onda ol fırmanyń normatıvtik talaptar júıesin basqarady.

Pem Bondı Donald Tramppen burynnan iskerlik qarym-qatynasta. Ol 2016 jyly Respýblıkalyq partııanyń ulttyq sezinde Demokratııalyq partııadan úmitker Hılları Klıntonǵa qarsy sóz sóılep, sonymen qatar Donald Tramptyń ımpıchment boıynsha alǵashqy sot protsesine qatysqan.

Buǵan deıin Tramp óziniń bolashaq ákimshiligine alǵashqy taǵaıyndaýlardy jarııalaǵan bolatyn. Sodan keıin ol Pentagon men TsRÝ basshylaryn atady jáne Maskqa úkimettiń tıimdilik departamentin basqarýdy usyndy.

Ol sondaı-aq Densaýlyq saqtaý mınıstrliginiń basshysy laýazymyna kishi Kennedıdiń kandıdatýrasyn usyndy, AQSh Memlekettik departamenti men Ulttyq barlaý basqarmasynyń basshylaryn jáne Aqúıdiń jańa baspasóz hatshysyn taǵaıyndady.

Sonymen qatar, Tramp AQSh-tyń energetıka mınıstri laýazymyna Liberty Energy munaı kompanııasynyń basshysyn tańdady.