AQSh-tyń áskerı ǵarysh ushaǵy 14 aıdan keıin Jerge oraldy

ASTANA. KAZINFORM – Amerıkalyq Boeing X-37B ǵarysh ushaǵy 14 aı boıy ǵaryshta birqatar tájirıbeler men manevrler júrgizdi. Bul týraly AQSh ǵarysh kúshteri málimdedi, dep habarlaıdy DW.

Orbıtalyq ushqysh ǵaryshta 434 kún bolyp, «AQSh ǵarysh kúshteriniń ǵaryshtyq orta týraly túsinigin jaqsartýǵa» baǵyttalǵan birqatar eksperıment pen manevrler júrgizgen.

— Bul tehnologııalar AQSh Ǵarysh kúshteriniń ǵarysh operatsııalaryn júrgizý qabiletin arttyrý úshin óte mańyzdy, - delingen habarlamada.

X-37B — ushaq pen ǵarysh kemesiniń gıbrıdi

X-37B 2023 jyldyń 29 jeltoqsanynda Florıda shtatyndaǵy Kanaveral múıisi áýe kúshteriniń stantsııasynan ushyryldy. Sodan keıin ol SpaceX kompanııasynyń Falcon Heavy asa aýyr zymyranynyń kómegimen alǵash ret áýege kóterildi.

X-37B adam basqaratyn ǵarysh kemesiniń mınıatıýralyq nusqasyna uqsaıdy. Onyń uzyndyǵy 9 metr, qanatynyń keńdigi 4,5 metr, ushyp kóterilý salmaǵy 5 tonnaǵa jýyq. Ol kún batareıalarynan qýat alady. Orbıtada ushýdan keıin qurylǵy ushaq rejıminde qonady.

X-37B 2010 jyldan beri qyzmet etýde. Ony AQSh Qorǵanys mınıstrligi úshin Boeing jáne Lockheed Martin birlesken kásiporny United Launch Alliance ázirlegen.

Aıta keteıik, buǵan deıin AQSh kompanııasy ushyrǵan «Blue Ghost» ǵarysh apparaty Aı betine sátti qonǵanyn jazǵan edik.