AQSh-tyń áskerı bıýdjeti ıadrolyq kúshterdi jańǵyrtý men ártaraptandyrýdy kózdeıdi
ASTANA.KAZINFORM — Aq úı AQSh Kongresine usynǵan 2027 qarjy jylyna arnalǵan áskerı bıýdjet jobasynda strategııalyq ıadrolyq qarýlardy jańǵyrtý jáne ártaraptandyrýǵa qarjy bólý qarastyrylǵan. Bul týraly BELTA jazdy.
Qujatta aıtylǵandaı, ıadrolyq kúshterdi jańartý jáne ártaraptandyrý, sondaı-aq ıadrolyq saladaǵy basqarý, baqylaý jáne baılanys júıelerin jetildirý arqyly bul bıýdjet AQSh-tyń qorǵanysynyń negizi sanalatyn tejeý júıesin qoldaýǵa baǵyttalǵan. Bul júıe el aýmaǵyna jáne strategııalyq mańyzdy múddelerine tónetin qaýipterge qarsy turý úshin qajet.
Atap aıtqanda, Vashıngton ákimshiligi kelesi jyly jańa ıadrolyq oqtumsyqtardy ázirleýge qarjy bólýdi josparlap otyr.
Sonymen qatar, qorǵanys úshin asa mańyzdy bolyp sanalatyn oq-dáriniń 12 túrin satyp alýǵa jáne olardyń óndirisin keńeıtýge qarjy bólý kózdelgen. Alaıda naqty qandaı qarý túrleri ekeni jarııalanbaǵan.
Qujatta bul ınvestıtsııalar AQSh-tyń qorǵanys ónerkásibiniń áleýetin arttyryp, bolashaqta oq-dárini keń kólemde óndirýge múmkindik beretini aıtylǵan.
Sonymen birge, AQSh syrtqy saıasat pen shetelge kórsetiletin kómekti qysqartýdy josparlap otyr. Bul qysqartý Birikken Ulttar Uıymyna tólenetin jarnalardy da qamtıdy.
Atap aıtqanda, AQSh-tyń Memlekettik departamenti men sheteldik kómek baǵdarlamalaryna 35,6 mlrd dollar bólý josparlanǵan. Bul ótken jylmen salystyrǵanda 15,5 mlrd dollarǵa nemese 30%-ǵa az.
Sonymen qatar:
-
halyqaralyq uıymdarǵa, sonyń ishinde BUU-ǵa jarnalar 2,7 mlrd dollarǵa qysqarady;
-
gýmanıtarlyq kómek – 2 mlrd dollarǵa;
-
azyq-túlik kómegi – 1,2 mlrd dollarǵa;
-
densaýlyq saqtaý baǵdarlamalary – 4,3 mlrd dollarǵa qysqarmaq.
Al odaqtastarǵa áskerı kómek kórsetýge, onyń ishinde qarý-jaraq jetkizýge 18 mlrd dollar qarastyrylǵan. Bul bıýdjet jobasynda Ýkraınaǵa jeke kómek týraly naqty aıtylmaǵan.
Aıta keteıik, buǵan deıin AQSh armııasynda áıelder erlermen birdeı áskerı daıyndyqtan ótetini habarlandy.
