Qazaqstanmen qarym-qatynasymyz qazir buryn-sońdy bolmaǵan deńgeıde nyǵaıdy — AQSh-tyń Almatydaǵy Bas konsýly

Kezdesý barysynda dıplomat jýrnalısterdiń suraqtaryna jaýap berip, Qazaqstan men AQSh arasyndaǵy yntymaqtastyqtyń damý perspektıvalary týraly aıtty.

Pıter Kaýfman ekijaqty qatynastardyń qarqyndy damyp kele jatqanyn atap ótip, ásirese saýda-ekonomıkalyq baılanystardyń artqanyna toqtaldy.

— Qazaqstanmen qarym-qatynasymyz qazir buryn-sońdy bolmaǵan deńgeıde nyǵaıdy. Ásirese eki el arasyndaǵy kommertsııalyq baılanystyń damýyn atap ótýge bolady. Bul baǵyt joǵary qarqynmen damyp keledi, — dedi Bas konsýl.

Onyń aıtýynsha, sońǵy bir jylda amerıkalyq jáne qazaqstandyq kompanııalar arasynda 17 mıllıard dollarǵa kelisimder jasalǵan. Al ekijaqty saýda kólemi 7 mıllıard dollarǵa jetken. Dıplomattyń sózinshe, bul kórsetkish 2020 jylmen salystyrǵanda shamamen eki ese joǵary.

— Amerıkalyq kompanııalar Qazaqstan ekonomıkasyna ınvestıtsııa salǵan alǵashqy sheteldik ınvestorlardyń qatarynda boldy. Sońǵy 35 jylda olar 100 mıllıard dollardan astam ınvestıtsııa saldy, — dedi ol.

Qazir Qazaqstanda shamamen 600 amerıkalyq kompanııa jumys isteıdi.

Pıter Kaýfman kólik jáne logıstıka, jasandy ıntellekt jáne sırek kezdesetin metaldar baǵytynyń bolashaǵy mol ekenin aıtty. Onyń aıtýynsha, amerıkalyq kompanııalar paıdaly qazbalardy óndirý salasyna úlken qyzyǵýshylyq tanytyp otyr.

Ol amerıkalyq kompanııalardyń Qazaqstanǵa zamanaýı tehnologııalar men jabdyqtar, korporatıvtik basqarýdyń jáne qorshaǵan ortany qorǵaýdyń joǵary standarttaryn usyna alatynyn atap ótti. Dıplomat avıatsııa salasyn da mańyzdy baǵyttardyń biri retinde atady.
C5+1 formaty aıasyndaǵy yntymaqtastyq

Kaýfman Ortalyq Azııa elderi men AQSh-ty biriktiretin C5+1 formatynyń mańyzyna toqtaldy. Dıplomattyń aıtýynsha, C5+1 aıasynda kommertsııalyq sektordaǵy yntymaqtastyq damyp keledi. Ol aldaǵy ýaqytta jasandy ıntellekt máselelerine arnalǵan kezdesý ótetinin atap ótti.
Konsýl Qazaqstannyń óńirlik qaýipsizdik, álemdik tártipti saqtaý jáne bitimgershilik máselelerindegi róline de toqtaldy.

— Amerıka Qurama Shtattary Qazaqstannyń beıbitshilik pen óńirlik turaqtylyqty nyǵaıtýdaǵy kóshbasshylyq rólin joǵary baǵalaıdy, — dedi Bas konsýl.

Ol aldaǵy ýaqytta Maıamıde G20 sammıti ótetinin jáne oǵan Qasym-Jomart Toqaevtyń qatysatynyn aıta ketti.
Onyń aıtýynsha, kezdesýler barysynda ekonomıkalyq yntymaqtastyq, halyq pen kompanııalar arasyndaǵy baılanystar, óńirlik qaýipsizdik jáne jasandy ıntellekt máseleleri talqylanýy múmkin.

Qazaqstandaǵy alǵashqy aılar týraly

Pıter Kaýfman Qazaqstandaǵy qyzmetiniń alǵashqy eki aıyndaǵy jeke áserlerin de bólisti.

— Otbasymmen birge ózimizdi munda óte jaıly sezinip júrmiz. Qazaqstan qonaqjaılyǵymen tanymal el, biz de muny sezindik. Sheteldikter úshin óte qolaıly el. Sol úshin alǵysymdy bildiremin, — dedi ol.

Bas konsýl otbasymen birge Úlken Almaty kóline baryp, taýda birneshe ret serýendep úlgergenin aıtty.

Kaýfman qazaq tiline de qyzyǵýshylyq tanytyp júrgenin atap ótti. Qazir qazaq tilin úırenip júr. Ol sóz arasynda qazaqsha sóıledi.

— Qazaq tili óte qıyn til. Sonymen birge erekshe ádemi til. Onyń ózindik qurylymy men sıngarmonızm zańy bar. Men sııaqty tildi endi ǵana úırenip júrgen adamdar úshin bul qıyn. Biraq sonysymen de erekshe, — dedi dıplomat.

Eske salsaq, AQSh Prezıdenti arnaıy ókili arqyly Qasym-Jomart Toqaevqa óziniń quttyqtaýyn joldaǵan edi.