AQSh-tyń Air Products kompanııasy Qazaqstanda gaz óńdeý jobalaryn júzege asyrady
ASTANA. KAZINFORM – Prezıdent Air Products bas atqarýshy dırektory Edýardo Menezespen kezdesý ótkizdi, dep habarlaıdy Aqorda.
Tabıǵı gaz óńdeý jáne ónerkásiptik gaz óndirisine mamandanǵan amerıkalyq kompanııa jetekshisimen kezdesý barysynda atalǵan saladaǵy yntymaqtastyqty damytý perspektıvasy qaraldy.
Memleket basshysynyń aıtýynsha, Qurama Shtattar – Qazaqstannyń iri ekonomıkalyq seriktesteriniń biri jáne elimiz ózara tıimdi baılanysty keńeıtýge múddeli.
Edýardo Menezes kompanııanyń Qazaqstan ekonomıkasyna ınvestıtsııa quıý múmkindigin qarastyratynyn jetkizdi. Óıtkeni Air Products gaz óńdeý men gaz hımııasy, sondaı-aq kómirdi tereń óńdeý salalaryndaǵy jobalardy júzege asyrýǵa qyzyǵýshylyq tanytady.
Osy oraıda Qasym-Jomart Toqaev atalǵan bastamany quptap, Qazaqstan tarapy oǵan qajetti qoldaý kórsetýge daıyn ekenin rastady.
Air Products kompanııasy AQSh-tyń iri kompanııalarynyń qataryna kiredi. Kógildir otyn óńdeý, ónerkásiptik gaz (azot, sýtegi, ottegi) óndirisi boıynsha halyqaralyq kóshbasshylardyń biri sanalady.
Aıta keteıik, búgin Prezıdent Túrki memleketteri uıymyna múshe elderdiń Joǵarǵy sot tóraǵalarymen kezdesti.
