AQSh-tyń 25 paıyz eksport bajy Qazaqstan fermerlerine qalaı áser etedi

ASTANA. KAZINFORM — Aýyl sharýashylyǵy mınıstri Aıdarbek Saparov Úkimet otyrysynan keıin ótken baspasóz máslıhatynda AQSh belgilegen 25 paıyz eksport bajy Qazaqstan fermerlerine qalaı áser etetinin aıtty.

— Bul aqparat búgin ǵana paıda boldy ǵoı. qazir taldaý jasap bastadyq. Qazaqstanǵa AQSh-tan ne jiberip jatqanyn, qalaı jiberip jatqanyn, ol eksportqa bizdiń jaqtan qandaı qoldaý bar ekenin zerdeleımiz. Sodan keıin baryp sheshim qabyldaımyz. Osy baǵytta Saýda jáne ıntegratsııa mınıstrligimen birge jumys isteımiz. Keıin Serik Maqashuly (Premer-mınıstrdiń orynbasary — Ulttyq ekonomıka mınıstri — red.) sheshim qabyldaıdy, — dedi ol.

Aıtýynsha, Qazaqstan AQSh-qa ósimdik sharýashylyǵynyń ónimderin eksporttaıdy.

— Jalpy ósimdik sharýashylyǵyn alsaq, krahmal, jelimtek (kleıkovına) eksportyn qoldaý sharalaryn búgin qarastyryp jatyrmyz. Sondyqtan bul bajdyń sonshalyq áseri bolmaıdy dep oılaımyn, — dedi Aıdarbek Saparov.

Aıta keteıik, AQSh prezıdenti resmı Astanaǵa Qazaqstan taýarlaryna 25 paıyzdyq baj salyǵyn engizgeni týraly hat joldaǵan bolatyn. Dál osyndaı baj Japonııa men Ońtústik Koreıa taýarlaryna da salynyp otyr.