AQSh-tyń 20-dan astam shtaty retsessııaǵa jaqyn — Moody’s

ASTANA. KAZINFORM — Moody’s Analytics málimetinshe, AQSh-tyń 20-dan astam shtatynyń ekonomıkasy quldyraýda nemese oǵan jaqyn, dep habarlaıdy FOX Business. 

Bas ekonomıst Mark Zandıdiń taldaýyna sáıkes, tamyz aıynyń aıaǵynda 21 shtat pen Kolýmbııa okrýgi retsessııaǵa kirý jaǵdaıyna tústi.

Illınoıs (AQSh JІÓ-niń 3,85%-y), Djordjııa (3,03%), Vashıngton (3,02%), Nıý-Djersı (2,93%), Massachýsets (2,73%) jáne Vırdjınııa (2,66%) retsessııa jaǵdaıynda nemese oǵan jaqyn.

Ekonomıkasy toqyraýǵa ushyraǵan shtattar quramyna Kalıfornııa (14,5%), Nıý-Iork (7,92%), Ogaıo (3,14%) jáne Mıchıgan (2,44%) kirip otyr.

Ekonomıkasy ósip kele jatqan shtattar arasynda Tehas (9,41%), Florıda (5,78%), Pensılvanııa (3,54%) jáne Soltústik Karolına (2,86%) bar.

Ekonomısttiń aıtýynsha, ońtústik shtattar negizinen eń myqty, biraq olardyń ósimi baıaýlap otyr. AQSh JІÓ-niń besten birinen astamyn quraıtyn Kalıfornııa men Nıý-Iork retsessııaǵa berilmeı otyr.

Buǵan deıin AQSh úkimeti jumysyn ishinara toqtatynyn habarlaǵan bolatynbyz.