AQSh-tyń 14 shtaty Donald Tramp pen Ilon Maskqa qarsy shaǵym túsirdi

ASTANA.KAZINFORM - Olar Ilon Masktyń úkimettiń tıimdilik departamentiniń (DOGE) basshysy retindegi róline narazy, dep habarlaıdy ABC News.

- Masktiń sheksiz ári baqylaýsyz bıligi úkimetti jumys oryndarynan aıyrady, bútindeı bir departtamenterdi qalamnyń ushymen joq qylý eldiń táýelsizdigin jeńip alǵandardy tańdaı qaqtyrar edi, - delingen Vashıngton sotyna beısenbi kúni berilgen shaǵymda.

Nıý-Meksıko shtatynyń soty Mask sııaqty mańyzdy jáne ókiletti adamdy Prezıdent konstıtýtsııaǵa saı resmı túrde taǵaıyndaýy jáne ony AQSh Senaty bekitýi kerek dep málimdeıdi.

- Nıý-Meksıko bas prokýrory men Arızona, Mıchıgan, Merılend, Mınnesota, Kalıfornııa, Nevada, Vermont, Konnektıkýt, Rod-Aılend, Massachýsets, Oregon, Vashıngton jáne Gavaıı ókilderiniń aryzynda: - Memlekettik bılikti resmı túrde saılanbaǵan adamnyń qolyna shoǵyrlandyrýdan artyq demokratııaǵa qaýip joq, - delingen.

Sonymen qatar, USAID-tiń 26 belsendisi jáne burynǵy qyzmetkeri beısenbi kúni Maskqa qarsy aıyp taǵyp, sotqa júgindi. Merılend shtatynyń federaldy sotyna berilgen bul talap Maskqa jáne onyń qaramaǵyndaǵylarǵa, eger Maskty Tramp resmı túrde usynbasa jáne ony Senat bekitpese, bıýdjetti qysqartýdy jalǵastyrýǵa tyıym salýdy talap etti.

Masktyń ózi jáne Tramp ákimshiligi jáne DOGE jaı ǵana úkimettiń úlken shyǵyndarymen jáne federaldy agenttikterdegi yqtımal jemqorlyqpen kúresip jatqanyn aıtady.

Aq úıdiń baspasóz hatshysy Kerolaın Levıttiń aıtýynsha, Mask «barlyq qoldanystaǵy federaldy zańdarǵa sáıkes» qyzmet etip jatyr.

Buǵan deıin Nıý-Iorktegi federaldy sýdıa Ilon Masktyń DOGE memlekettik tólem júıesine qol jetkizýin ýaqytsha shektegen bolatyn.

Osyǵan deıin Vashıngtondaǵy USAID shtab-páteri jabylatyny týraly jazdyq.

Saýda jáne ıntegratsııa vıtse-mınıstri Qaırat Tórebaev AQSh Halyqaralyq damý agenttiginiń jumysyn toqtatýy Qazaqstanda bastalyp ketken jobalarǵa qalaı áser etip jatqany týraly pikir bildirdi.