AQSh-tyń 12 shtatyndaǵy sý júıeleri kıbershabýylǵa ushyrady
ASTANA. KAZINFORM – AQSh-tyń keminde 12 shtatyndaǵy memlekettik sýmen jabdyqtaý júıeleri kıbershabýyldarǵa ushyrady. Bul kommýnaldyq ınfraqurylymnyń kıberqaýipsizdigindegi osal tustarǵa qatysty alańdaýshylyqty kúsheıtti, dep habarlaıdy Kazinform agenttiginiń Vashıngtondaǵy menshikti tilshisi CBS News-ke silteme jasap.
Kıberqaýipsizdik salasynyń mamandary shabýyldar ınternetke qosylǵan, qorǵanys deńgeıi tómen óndiristik kompıýterlerdi paıdalanatyn myńdaǵan sýmen jabdyqtaý júıesiniń osal ekenin kórsetti.
Shabýyldardyń negizgi nysanasyna óndiristik jabdyqtardy, sý qysymyn jáne tazartý stantsııalaryndaǵy hımııalyq zattardyń mólsherin basqaratyn baǵdarlamalanatyn logıkalyq kontrollerler (PLC) aınaldy.
AQSh-tyń Kıberqaýipsizdik jáne ınfraqurylymdy qorǵaý agenttiginiń (CISA) málimetinshe, kóptegen kontroller ınternetke brandmaýersiz, VPN qorǵanysynsyz, al keı jaǵdaıda tipti qupııasózsiz qosylǵan. Sonyń saldarynan hakerler júıege ońaı enip, qurylǵylardyń jumysyn basqara alǵan.
Kıbershabýyldar Djordjııa, Mıchıgan, Mınnesota, Nıý-Djersı jáne Ońtústik Dakota shtattaryndaǵy sýmen jabdyqtaý júıeleriniń jumysyna irkilis ákeldi. Hakerler qurylǵylardyń IP-mekenjaılaryn ózgertip, operatorlardyń qoljetimdiligin buǵattaǵan. Keıbir jaǵdaılarda sý qysymy tómendep, sýmen qamtý ýaqytsha toqtap, kásiporyndar qolmen basqarý rejımine kóshken.
Mamandar shabýyldardyń naqty aýqymy budan da keń bolýy múmkin ekenin aıtady, óıtkeni kommýnaldyq qyzmetter mundaı oqıǵalardyń barlyǵy týraly mindetti túrde esep bermeıdi.
Ázirge shabýyldar úshin jaýapkershilikti eshbir top moınyna alǵan joq. AQSh bıligi bul áreketterge Iran qoldaıtyn hakerlerdiń qatysy bolýy múmkin degen boljam jasap otyr. Sonymen qatar shabýyldar aýyz sýdyń sapasyna áser etpegen, al kommýnaldyq kásiporyndar júıelerdi qysqa merzimde tolyq baqylaýyna qaıtardy.
