AQSh Taıaý Shyǵystaǵy «Lınkolnniń» ornyna «Vashıngton» ushaq tasýshy kemesin jiberdi
ASTANA. KAZINFORM – AQSh Taıaý Shyǵystaǵy USS Abraham Lincoln ushaq tasymaldaǵyshyn almastyrý úshin USS George Washington bastaǵan jańa ushaq tasymaldaǵysh tobyn jiberdi, dep habarlaıdy Euronews.
AQSh áskerı kúshteri beısenbi kúni jańa ushaq tasymaldaǵysh tobynyń Taıaý Shyǵysqa kelgenin habarlady. Al osy kezde aımaqta mıssııa oryndap júrgen USS Abraham Lincoln bortyndaǵy jaǵdaıǵa qatysty alańdatarlyq aqparattarǵa baılanysty Donald Tramp ákimshiligi synǵa ushyrap jatyr.
– USS George Washington bastaǵan ushaq tasymaldaýshy soqqy toby keshe CENTCOM-nyń jaýapkershilik aımaǵyna kelgennen keıin josparly rotatsııa aıasynda Taıaý Shyǵysta operatsııa júrgizip jatyr, – delingen AQSh Qarýly kúshteri Ortalyq qolbasshylyǵynyń (CENTCOM) X áleýmettik jelisindegi habarlamasynda.
U.S. Sailors work on the flight deck of USS George Washington (CVN 73), Aug. 20, as the aircraft carrier transits the Arabian Sea. The George Washington Carrier Strike Group is operating in Middle East during a scheduled deployment after arriving in the CENTCOM theater yesterday. pic.twitter.com/DEkHHukHeI
— U.S. Central Command (@CENTCOM) August 20, 2026
Bul málimdeme ótken jylǵy qarashadan beri teńizde júrgen USS Abraham Lincoln bortyndaǵy aýyr jaǵdaı týraly amerıkalyq BAQ-ta materıaldar jarııalanǵannan birneshe kún ótken soń jasaldy.
Ótken jumada Tramp «Lınkolndegi» áskerı qyzmetshilerdiń turmys jaǵdaıy men psıhologııalyq ahýalyna qatysty alańdaýshylyqty joqqa shyǵardy. Degenmen ol kemeniń jaqyn arada áskerı is-qımyldar aımaǵynan shyǵarylatynyn aıtty.
Jýrnalıster odan USS Abraham Lincoln-degi jaǵdaıǵa áskerı qyzmetshilerdiń týystary alańdap otyr ma dep suraǵan.
– Joq, alańdamaıdy, – dep jaýap berdi Tramp.
AQSh prezıdenti ushaq tasymaldaǵyshtyń basqa kememen almastyrylatyny týraly aqparatty da rastady.
– Bul keme qazirdiń ózinde jolda nemese jaqyn arada attanady. Ony soǵan óte uqsas basqa keme almastyrady, – dedi ol.
Amerıkalyq BAQ, sonyń ishinde áskerı taqyrypqa mamandanǵan basylymdar ekıpaj músheleriniń kóptegen týystaryna silteme jasap, USS Abraham Lincoln bortyndaǵy turmys jaǵdaıynyń nasharlaǵanyn habarlady. Sonymen qatar birneshe adamnyń ózine qol jumsaýǵa árekettengeni týraly aqparat tarady.
Teńizshilerdiń otbasylary keltirgen málimetterdiń arasynda eki áskerı qyzmetshiniń kemeden sýǵa sekirýge áreket jasaǵany týraly aqparat ta bar.
AQSh áskerı kúshteri 3 tamyzda teńizge qulaǵan bir teńizshiniń qutqarylǵanyn málimdedi.
Eske sala ketsek, bıyl naýryzda AQSh-tyń eń iri ushaq tasymaldaǵysh kemesi Qyzyl teńizge kirkenin jazǵan edik.
