AQSh Taıaý Shyǵysta jaǵdaı ýshyǵýy múmkin ekenin eskertti
ASTANA. KAZINFORM – AQSh-tyń Taıaý Shyǵystaǵy elshilikteri Saýd Arabııasyndaǵy nysandarǵa hýsıtterdiń shabýyldarynan keıin amerıkalyq azamattardy saq bolýǵa shaqyrdy, dep habarlaıdy Euronews.
Bahreın, Izraıl, Irak, Iordanııa, Kýveıt, Lıvan, Oman, Katar, Saýd Arabııasy jáne Birikken Arab Ámirlikterindegi AQSh dıplomatııalyq ókildikteri qaýipsizdik salasyndaǵy jaǵdaı kúrdeli kúıinde qalyp otyrǵanyn málimdedi.
– Áskerı qaqtyǵys tez arada ýshyǵýy múmkin, – delingen AQSh dıplomatııalyq ókildikteriniń eskertýinde.
Sondaı-aq amerıkalyq azamattarǵa áýe reısteriniń toqtatylýy, áýe keńistiginiń jabylýy jáne kólik qatynasyndaǵy irkilister bolýy múmkin ekeni eskertilgen.
Mundaı eskertý hýsıtterdiń senbi kúni Saýd Arabııasyndaǵy nysandarǵa ballıstıkalyq jáne qanatty zymyrandar, sondaı-aq ushqyshsyz ushý apparattaryn qoldanyp eki operatsııa júrgizgenin málimdeýinen keıin jasaldy.
Hýsıtterdiń málimetinshe, alǵashqy operatsııa Er-Rııadtaǵy mańyzdy nysandarǵa, al ekinshisi ıAnbýdaǵy Aramco kompanııasynyń nysandaryna baǵyttalǵan.
Keıin Saýd Arabııasy bastaǵan koalıtsııa ókili koroldiktiń áýe shabýylyna qarsy qorǵanys kúshteri Er-Rııadqa baǵyttalǵan ballıstıkalyq zymyrandy ustap qalǵanyn rastady. Onyń aıtýynsha, hýsıtter Baısh, Taıf, Farasan jáne ıAnbý qalalaryna da soqqy jasaǵan.
Senbi kúni Er-Rııad turǵyndary Korol Halıd atyndaǵy halyqaralyq áýejaı aýmaǵynda ot pen tútin kórgenin habarlaǵan.
Hýsıtter shilde aıynda Saýd Arabııasyna teńiz blokadasyn jarııalaǵan. Sodan beri Saýd Arabııasynyń qalalary men kemelerine jasalǵan shabýyldar Taıaý Shyǵystaǵy shıelenisti kúsheıte tústi.
Saýd Arabııasy da hýsıtterge qarsy soqqylar jasap keledi.
