AQSh Taıaý Shyǵysqa taǵy bir áskerı kemesin jiberdi
ASTANA. KAZINFORM — 28 naýryz kúni Taıaý Shyǵysqa USS Tripoli kelip jetti. Bul AQSh Áskerı-teńiz kúshteriniń soqqy berýshi kemesi, dep habarlaıdy BILD.
Uzyndyǵy 257 metr bolatyn keme bortynda 3 myńnan astam teńiz jaıaý áskeri bar, sondaı-aq áskerı kúshti jetkizýge qabiletti MV-22B Osprey konvertoplandary ornalasqan. Kemeniń aımaqqa kelýi AQSh-tyń Iran aýmaǵynda qurlyq operatsııasyn bastaý yqtımaldyǵy týraly áńgimelerdi kúsheıtti.
USS Tripoli 2020 jyldan beri qyzmette. Bul keme «shaǵyn áýe tasymaldaýshy» retinde sanalady — mysaly, USS Gerald R. Ford sııaqty 337 metrlik alyp kemeden kishi. Alaıda onyń negizgi mindeti bólek: ol áskerdi jyldam túrde qurlyqqa jetkize alatyn ushaqtar men tikushaqtarǵa arnalǵan.
Kemeniń palýbasynda ushyp-qona alatyn MV-22B Osprey apparattarymen qatar, aýyr júk tasymaldaıtyn CH-53K King Stallion tikushaqtary jáne shabýyldaýshy AH-1Z Viper tikushaqtary bar. Sonymen birge shamamen 20 kópmaqsatty F-35B Lightning II joıǵysh ushaǵy ornalastyrylǵan. Bul ushaqtar da ushyp-qoný múmkindigine ıe, ári qaýipti operatsııalarda áýe qoldaýyn kórsetýge qolaıly.
Keme ózin qorǵaý úshin de jaqsy qarýlanǵan: mysaly, qanatty jáne kemege qarsy zymyrandardy tosyp alýǵa arnalǵan Rim-162 jáne Rim-116 zenıttik júıeleri bar. Sonymen qatar, shaǵyn kemeler men teńiz mınalaryna qarsy jyldam atylatyn artıllerııalyq qondyrǵylarmen jabdyqtalǵan.
Aıta ketelik AQSh-tyń desanttyq kemesi Taıaý Shyǵysqa jetkeni týraly jazǵan edik.
