AQSh táýelsizdiginiń 250 jyldyǵyna arnalǵan kontsert ótpeýi múmkin

Freedom 250 – AQSh-tyń 250 jyldyǵyna arnalǵan úlken is-sharalardy ótkizýmen aınalysatyn uıymdastyrýshylyq joba. 

25 maýsym men 10 shilde aralyǵynda National Mall-da ótýi josparlanǵan Freedom 250 kontsertterine Martına Makbraıd, Morrıs Deı jáne The Time, The Commodores jáne Poison tobynyń Bret Maıkls sııaqty ártisteri qatysýy tıis, alaıda olardyń barlyǵy keıinnen qatysýdan bas tartty.

Amerıkalyq ánshi Martına Makbraıd áleýmettik jelidegi jazbasynda «ózine partııada joq is-sharada óner kórsetýge usynys jasalǵanyn, biraq bul alaıaqtyq bolyp shyqqanyn» jazyp, is-sharaǵa nelikten qatyspaýdy sheshkenin túsindirdi. 

Olaı bolǵanymen, Vanilla Ice, Milli Vanilli jáne Flo Rida sııaqty keıbir ártister Freedom 250-de óner kórsetýdi josparlap otyrǵanyn málimdedi.

Amerıkalyq reper Vanilla Ice áleýmettik jelilerde: «Bul saıası platforma emes. Bul Amerıkanyń týǵan kúnin toılaý», - dep jazyp, is-sharaǵa qatysýdan bas tartpaıtynyn málimdedi.

Tramp áleýmettik jelilerde is-sharada óner kórsetýden bas tartqan ártisterdi «úshinshi surypty» dep atap, AQSh-ty biriktiretin sóz sóıleıtinin málimdedi. 

- Ártisterdiń aldaǵy qoıylymǵa baılanysty «kúıgelektenýin» túsinemin, sondyqtan men dál prezıdent bolǵannan beri jasaǵanymdaı álemdegi eń úlken juldyz, Elvıstiń eń jaqsy kezeńinen áldeqaıda kóp kórermen jınaıtyn jáne ony gıtarasyz jasaıtyn adamdy, elimizdi álemdegi kez kelgen adamnan artyq jaqsy kóretin adamdy jáne keıbireýleri Donald Trampty tarıhtaǵy eń uly prezıdent dep ataıtyn adamdy osy joǵary aqy tólenetin, úshinshi suryptaǵy «ártisterdiń» ornyna kelip, eldi biriktiretin kúshti sóz sóıleýge shaqyrýdy qarastyryp otyrmyn!, - dep jazdy ol Truth Social-da.

Keıin Aq úı basshysy áleýmettik jelidegi taǵy bir jazbasynda is-sharany toqtatyp, onyń ornyna mıtıng ótkizý kerek dep jazdy. 

- Mýzykasyn eshkim tyńdaǵysy kelmeıtin jáne tek shaǵymdanatyn tym baǵalanǵan ánshilerdi shaqyrýdyń ornyna, AQSh táýelsizdiginiń 250 jyldyǵyn atap ótý úshin «Amerıkany qaıtadan uly eteıik» atty úlken mıtıng ótkizýimiz kerek. Ony toqtatyńyz, - dep málimdedi Tramp.

Aq úı AQSh táýelsizdiginiń mereıtoıyn atap ótýge arnalǵan Freedom 250 birqatar is-sharalaryn qoldap otyr. 

Olardyń qataryna Ońtústik kógaldaǵy UFC jekpe-jegi, maýsym men shilde aılaryndaǵy Úlken amerıkalyq memlekettik jármeńke jáne tamyz aıynda el astanasynda ótetin Gran-prı jarysy kiredi

AQSh sondaı-aq Tramp portreti bar estelik tólqujattardyń shekteýli sanyn shyǵarady.

Aıta keteıik, AQSh-ta Tramp beınelengen 250 dollarlyq kýpıýra shyǵarylýy múmkin.